Գերմանիայի արտաքին գործերի նախարար Ֆրանկ Վոլտեր Շտայնմայերը հայտարարություն է տարածել Երկրորդ համաշխարհային պատերազմի ավարտի 71-ամյակի կապակցությամբ։ Այս մասին տեղեկացնում է LNR Media-ն։
Գերմանիայի արտաքին գերատեսչության ղեկավարը, անդրադառնալով Երկրորդ համաշխարհային պատերազմի ավարտի 71-ամյակին, մասնավորապես ասել է, որ Գերմանիան առանձնահատուկ պատասխանատվություն է կրում աշխարհի խաղաղության և համաձայնության մթնոլորտի համար։
Շտայնմայերի հայտարարության մեջ ասվում է. «Մեր երկիրը, որը 20-րդ դարում անցավ այդքան պատերազմների և տառապանքների միջով, կարողացավ կրկին վերադառնալ միջազգային հանրության սիրտը։ Եվրոպան համագործակցության և երկխոսության ցայտուն նախագիծ է դարձել։ Մենք շնորհակալ ենք դրա համար»։
Գերմանիայի ԱԳ նախարարը խոսել է նաև աշխարհում գերմանացիների դերի մասին. «Մենք՝ գերմանացիներս, հատուկ պատասխանատվություն ենք կրում խաղաղության և փոխհամաձայնության հաստատման համար՝ հատկապես այնպիսի ճգնաժամային ժամանակներում, ինչպես այսօր է»։
