Հայաստանն առայժմ ունի 22 օլիմպիական վարկանիշ: Բայց դա դեռ սահմանը չէ: Առաջիկա օրերին մեր օլիմպիական հավաքականի կազմը ամենայն հավանականությամբ եւս մի քանի հոգով կհամալրեն հունահռոմեական եւ ազատ ոճի ըմբիշները, որոնք Ստամբուլում մասնակցելու են վարկանիշային վերջին մրցաշարին: Լուրջ ակնկալիքներ ունենք նաեւ թեթեւ աթլետներից: Սակայն Հայաստանը պատմականորեն օլիմպիական խաղերին մասնակցում է բացառապես անհատական մարզաձեւերում: Իսկ երբեւէ մենք կկարողանա՞նք ներկայանալ նաեւ թիմային մարզաձեւերում:
Այս թեմայի շուրջ «Առավոտը» զրուցել է ՀԱՕԿ-ի գլխավոր քարտուղար, Հայաստանի բասկետբոլի ֆեդերացիայի նախագահ Հրաչյա Ռոստոմյանի հետ:
– Պարոն Ռոստոմյան: Հայաստանը երբեւէ օլիմպիական խաղերի մասնակից թիմ կունենա՞: Հենց թեկուզ բասկետբոլի օրինակով, որը ղեկավարում եք դուք:
– Եթե նկատի ունեք դասական բասկետբոլը, առայժմ վաղ է այդ մասին խոսել: Պատկերացնո՞ւմ եք, որ այսօրվա դրությամբ Ռուսաստանի պես հզոր բասկետբոլային երկիրը դեռ ուղեգիր չունի: Այդ խնդրի առջեւ կանգնած են նաեւ մարզաձեւի այլ հզոր տերություններ:
Կարդացեք նաև
– Վերջին տարիներին հանրապետությունում խաղային մի քանի մարզաձեւեր, հատկապես բասկետբոլը, դրական առաջընթաց են արձանագրում:
– Բայց մինչեւ օլիմպիական երազանք, դրանք դեռ երկար ճանապարհ պետք է անցնեն: Այո, մեծահասակների մեջ մենք ունենք տղամարդկանց եւ կանանց չորս թիմեր, որոնք հաջող են հանդես գալիս միջազգային մրցաշարերում: Այդ թիմերը բավականին լուրջ հավակնություններ ունեն: Այս տարի նախատեսում ենք շարունակել մասնակցել մրցաշարերին, մտնել եզրափակիչներ ու արդեն պայքարել մեդալների համար՝ առայժմ գոնե երկու: Խոսքը տղաների մեծահասակների եւ աղջիկների 18 տարեկան թիմերի մասին է: Իսկ 16 եւ 20 տարեկանների խնդիրը լավագույն տասնյակ մտնելն է, ինչը ամենեւին էլ հեշտ չէ:
Ինչ վերաբերում է մյուս խաղային մարզաձեւերին, խոսենք վիճակագրության եւ թվերի պարզ լեզվով: Անցած տարի չի եղել մի խաղային մարզաձեւ, որտեղ Հայաստանն ավելի լավ մասնակցած չլինի, քան նախորդ տարիներին:
– Որքան տեղյակ եմ, աշխարհում բասկետբոլի մի նոր տարբերակ՝ 3×3 ձեւաչափով բասկետբոլը, զարգանում եւ տարածվում է մեծ թափով եւ այստեղ Հայաստանը հաջողության հասնելու ավելի մեծ հնարավորություններ ունի:
– Ճիշտ եք նկատել: 3×3 ձեւաչափով բասկետբոլն արդեն ընդգրկվել է պատանեկան օլիմպիական խաղերի ծրագիր եւ հավակնում է շատ մոտ ապագայում տեղ զբաղեցնել նաեւ օլիմպիական խաղերի մարզաձեւերի շարքում: Այ, այդ ժամանակ մենք կարող ենք շատ արագ օլիմպիական վարկանիշ ունենալ:
ԱՇՈՏ ՀԱԿՈԲՅԱՆ
«Առավոտ» օրաթերթ
06.05.2016
