«Օքսֆամ Հայաստանյան գրասենյակը» և «Տնտեսական զարգացման և հետազոտությունների կենտրոնը մայիսի 6-ին «Հիլթոն» հյուրանոցում ներկայացրեցին «Ընտանիքի կենսամակարդակի բարձրացմանն ուղղված նպաստներ» և «Սոցիալապես անապահով և հատուկ խմբերում ընդգրկվածներին բժշկական օգնության ծառայություններ» բյուջետային ծրագրերի անկախ գնահատման արդյունքները:
Հետազոտությունների համաձայն` Հայաստանում աղքատ է գրեթե ամեն 3-րդ ընտանիքը. նպաստների համակարգից դուրս են մնացել ծայրահեղ աղքատների կեսից ավելին, իսկ նպաստառուների գրեթե 44 տոկոսը աղքատ չեն: Այս առնչությամբ ՀՀ աշխատանքի եւ սոցիալական հարցերի փոխնախարար Սոնա Հարությունյանը լրագրողների հետ զրույցում մտահոգություն հայտնեց. «Ընտանիքի կարիքավորության վրա ազդում է ոչ թե 18 կամ 20 գործոն, այլ 1000 ու մի գործոն, որոնք բոլորը հաշվի առնելն ու գնահատելն անհնար է»:
Հարությունյանի գնահատմամբ` այս վերլուծությունները բավականին հանգամանալից են, եւ նախարարությանը հստակ առաջարկներ են ներկայացվել. «Հանրապետությունում ունենք 30 տոկոս աղքատություն, այսինքն` 700 հազար ընտանիքներից 200 հազարն աղքատ է: 105 հազար ընտանիք է ստանում ընտանեկան նպաստ, այսինքն` աղքատ ընտանիքներ կան, որոնք դուրս են մնում այս ծրագրից»,-փաստեց նա:
Կարդացեք նաև
Տիկին Հարությունյանը եւս նկատեց, որ ընտանեկան նպաստների ծրագրում ընդգրկված են ոչ շատ աղքատ ընտանիքներ. «Այս տեսանկյունից ծրագրի հասցեականության բարձրացման խնդիր կա, այս ուղղությամբ ձեռնարկվող աշխատանքները հրատապ են»:
Փոխնախարարը նաեւ ասաց, որ իրենց մասնագետների գնահատականները եւս անկախ են եւ բավականին խիստ: Ինչ վերաբերում է նշյալ հետազոտություններին եւ ՀԿ-ների առաջարկներին, Սոնա Հարությունյանը հավելեց. «Մենք ունենք որոշման նախագիծ, որ եթե ընտանիքի անդամներից մեկը համարվում է հարգելի բացակա եւ մեկնել է արտագնա աշխատանքի, ապա խնդիրը կվերանայվի, որովհետեւ այսպես թե այնպես ընտանիքի բացակա անդամի գոյությունն ազդում է ընտանիքի ապահովության միավորի վրա: Հիմա հարգելի բացական չի ազդում, այդ պատճառով հարցը պետք է վերանայվի»:
«Սոցիալապես անապահով և հատուկ խմբերում ընդգրկվածներին բժշկական օգնության ծառայություններ» ծրագրի մասին` քիչ ուշ:
Լուիզա ՍՈՒՔԻԱՍՅԱՆ
