Այս շաբաթ Բուդապեշտում կայացած հերթական համաժողովում 28 կողմ, 24 դեմ եւ 2 անվավեր քվեարկության արդյունքներով իր անկախության համար պայքարող եւ որոշ երկրների կողմից ճանաչված Կոսովոյի ֆուտբոլի ֆեդերացիան համալրեց ՈՒԵՖԱ-ի անդամ երկրների շարքը:
Քվեարկությունը, որին մասնակցել է նաեւ Հայաստանը, անցել է փակ գաղտնի: Ավելի ուշ Գերմանիան հայտարարեց, որ ինքը կողմ է քվեարկել Կոսովոյի անդամակցությանը ՈՒԵՖԱ-ին:
Եվրոպական շախմատային միության աշնանը կայացրած որոշմամբ մայիսի վերջին նույն Կոսովոյում կայանալու է շախմատի Եվրոպայի տղամարդկանց անհատական առաջնությունը: Ընդ որում, Կոսովոյի շախմատային ֆեդերացիան էլ ԵՇՄ-ին անդամակցել է անցած տարվա աշնանը:
Aravot.am-ը թե ՀՇՖ-ից, թե ՀՖՖ-ից փորձեց պարզել, թե երկու ֆեդերացիաներն էլ ի՞նչ դիրքորոշում են ունեցել Կոսովոյի եվրոպական մարզական այդ երկու միությունների կազմ մտնելու քվեարկության ժամանակ՝ նկատի ունենալով, որ պաշտոնական Հայաստանը առայսօր չի ճանաչել Կոսովոյի անկախությունը: Երկու ֆեդերացիաներից էլ պատասխանեցին, թե քվեարկությունը եղել է փակ գաղտնի եւ իրենք իրավունք չունեն կամ նպատակահարմար չեն համարում իրենց դիրքորոշման մասին խոսել:
Կարդացեք նաև
Աշոտ ՀԱԿՈԲՅԱՆ
Լուսանկարը՝ popmech.ru-ի
