Գերմանիայի Բունդեսթագի պատգամավոր, «Քրիստոնեա-դեմոկրատական միություն» կուսակցության անդամ, հայ-գերմանական ֆորումի նախագահ Ալբերտ Վայլերին մայիսի 6-ին լրագրողները խնդրեցին անդրադառնալ Գերմանիայի Բունդեսթագում Հայոց ցեղասպանության ճանաչման մասին բանաձեւին:
Նա նշեց, որ կարծում է՝ հունիսի 2-ին Գերմանիայի Բունդեսթագը հավանության կարժանացնի Հայոց ցեղասպանության ճանաչման բանաձեւը. «Ես կարծում եմ, որ ամեն դեպքում մենք այդ հարցում կունենանք մեծամասնություն, այսինքն՝ բանաձեւը համապատասխան հավանության կարժանանա: Այս պահին բանակցություններ են ընթանում խմբակցությունների միջեւ: Կարող եմ ասել, որ «ցեղասպանություն» բառը վերտառությունում տեղ է գտնելու, ինչպես նաեւ բանաձեւում անդրադարձ է լինելու կայսերական Գերմանիայի պատմական պատասխանատվությանը, ինչպես նաեւ կարեւոր կետ է, որ Գերմանիան աջակցի Հայաստանի եւ Թուրքիայի միջեւ հարաբերությունների նորմալացման գործընթացին»:
Հարցին, թե հաշվի առնելով Թուրքիայի գործոնը, արդյոք ճնշումներ նկատվե՞լ են, Ալբերտ Վայլերը պատասխանեց, որ բանաձեւի հետ կապված թուրքական կողմից արդեն արձագանքներ կան. «Սակայն, ինչպես կոալիցիոն կուսակցությունները, նաեւ ընդդիմադիր կանաչները ղեկավարության մակարդակով հայտարարել են, որ ամեն դեպքում հունիսի 2-ին դա արվելու է: Եվ ինձ համար էլ է կարեւոր է, որ հունիսի 2-ին ընդունվի բանաձեւը»:
Ամի ՉԻՉԱԿՅԱՆ
Կարդացեք նաև
