Վաղը կառավարությունն իր` նախկինում ընդունած որոշման մեջ, որով կարգավորվում էր ազատ տնտեսական գոտու համար ներկայացվող պահանջները, փոփոխություն կանի` այդպիսով ֆինանսների նախարարությունից վերցնելով ազատ տնտեսական գոտու շահագործողի լիազորությունները սահմանողի պարտականությունները եւ հանձնելով Պետական եկամուտների կոմիտեին` ՊԵԿ-ին: Այս որոշման նախագծում, որը կառավարության վաղվա նիստում վարչապետին կներկայացնի էկոնոմիկայի նախարար Արծվիկ Մինասյանը, լիազոր մարմնի փոփոխությունը պատճառաբանված է ֆիննախից ՊԵԿ-ի առանձնանալու փաստով: Սույն որոշումով, այսուհետ ՊԵԿ-ը կստանձնի ազատ տնտեսական գոտու կազմակերպչի ընտրության ու չափանիշների սահմանման, ազատ տնտեսական գոտում շահագործողների թույլտվության տրամադրման եւ դադարեցման, ինչպես նաեւ մի շարք այլ լիազորություններ:
Ըստ կառավարության պատասխանատուների՝ այս փոփոխության համար հիմք է ընդունվում ՀՀ նախագահի ՆՀ-213-Ն հրամանագիրը՝ «Հայաստանի Հանրապետության ֆինանսների նախարարությունը վերակազմակերպելու եւ Հայաստանի Հանրապետության նախագահի 2002 թվականի մարտի 16-ի ՆՀ-1063 հրամանագրում փոփոխություն եւ լրացում կատարելու մասին», որով Հայաստանի Հանրապետության ֆինանսների նախարարությունը վերակազմակերպվում է, եւ դրանից առանձնանում է ՀՀ կառավարությանն առընթեր պետական եկամուտների կոմիտեն:
Լուսինե ԲՈՒԴԱՂՅԱՆ
