«Զորքերի բացազատված իրավիճակում ամենօրյա մարտական խնդիրներ կատարելու ժամանակ կատարվում է ոչ ստանդարտ մատակարարման գործընթաց»,- մայիսի 3-ին «Մեդիա կենտրոնում» լրագրողների հետ հանդիպման ընթացքում ասաց ՊՆ մամուլի խոսնակ Արծրուն Հովհաննիսյանը:
Նա նշեց, որ հանդերձանքի, սնունդի եւ այլ հարցերի հետ չնչին խնդիրները չպետք է առաջին կարեւորության խնդիր դարձնել. «Զինված ուժերում չկա գլոբալ ո՛չ անձրեւանոցի, ո՛չ սնունդի, ո՛չ հագուստի, ո՛չ զենքի, ո՛չ էլ այլ խնդիր: Որովհետեւ ինչքան էլ, որ սիրուն է հնչում, հերոսական եւ գեղեցիկ՝ իրականում, առանց զենքի հաղթանակներ չեն լինում»:
Արծրուն Հովհաննիսյանը նշեց, որ ոգին մարտունակության ապահովման գործընթացից է ծնվում. «Եթե զինվորն ի վիճակի է իր վրա կրակող ուղղաթիռի դեմ դիմաց կանգնել, սառնասրտորեն արձակել ձգանը, վերալիցքավորել նռնականետը, եւս մեկ անգամ կրակել, այդ զինվորը, բնականաբար, տնից չէր բերել այդ հմտությունը: Իր մարտական պատրաստվածության դասի ժամանակ է սովորել՝ ինչպես դա անել, իսկ այդ դասընթացը կազմակերպողը զինվորը չէր, համապատասխան հրամանատարն է եղել: Եթե հրամանատարը չսովորեցներ այդքան բան, զինվորը դա չէր կարող անել, մեքենա վարել չէ, որ դրսում սովորել է, եկել է բանակ: Նռնականետ կրակելը բավականին բարդ բան է»:
Ամի ՉԻՉԱԿՅԱՆ
