«Մեր երկրում աշխատուժի առաջարկը գերազանցում է պահանջարկը» ապրիլի 30-ին «Դիալոգ» մամուլի ակումբում լրագրողների հետ հանդիպման ընթացքում նկատեց Աշխատանքի եւ սոցիալական հարցերի նախարարության աշխատանքի եւ զբաղվածության վարչության պետ Թադեւոս Ավետիսյանը:
Նա նշեց, որ ստեղծված իրավիճակում աշխատողները իրենց իրավունքները երկրորդական են համարում՝ փորձելով պահպանել իրենց աշխատատեղը, որովհետեւ մրցակցությունը ավելի մեծ է. «Ես համաձայն չեմ այն տեսակետին, որ դա կապվում է գործատուի իրավակազմակերպչական ձեւից: Այսինքն՝ գործընթաց է, որը հատուկ է ե՛ւ խոշոր գործատուներին, ե՛ւ փոքր գործատուներին: Եվ եթե ունեն օբյեկտիվ հիմքեր, ենթադրենք՝ մարդը չի ուզում ազատվել աշխատանքից, որովհետեւ ընտանիք է պահում, երեխաներ ունի, անկախ նրանից, թե հիսուն հոգանոց կոլեկտիվում է, քսան, թե տաս, նա այդ մղումով չի անդրադառնա»:
Անդրադառնալով պետական ծառայողներին՝ Թադեւոս Ավետիսյանն ասաց, որ համակարգում ներդրված է աշխատանքի կատարողականի գնահատման համակարգ, ցանկացած շարժ ենթակա է գնահատման. «Դրա արդյունքում է, որ մենք շարունակում ենք մնալ աշխատանքի, որովհետեւ 75 տոկոսից ցածր գնահատման պարագան աշխատանքից ազատման հիմք է: Երկրորդը, որը կարեւոր է, պարգեւատրման լինելու-չլինելու չափի հիմնական գործոնն է: Այսինքն՝ ամեն օր եւ օրական մի քանի անգամ կատարված գործողությունը գնահատվում է եւ դա ամփոփվում դառնում է մեր օրվա, ամսվա, կիսամյակի, տարվա գնահատականը»:
Ամի ՉԻՉԱԿՅԱՆ
Կարդացեք նաև
