Ապրիլի 4-ից Արցախի հարավ-արեւելյան սահմանի առաջնագծում մարտական խնդիրներ իրականացնող «Հայոց արծիվներ» մարտական ջոկատն այսօր վերադարձավ Երեւան:
Ջոկատն առաջինն այցելեց Ցեղասպանության զոհերի հուշահամալիր՝ հարգանքի տուրք մատուցելու Մեծ Եղեռնի 1,5 միլիոն նահատակների հիշատակին: Մարտիկների առաջին հանդիպումն իրենց ընտանիքների հետ կայացավ հենց Ծիծեռնակաբերդում:
Ջոկատի հրամանատար, «Հայոց արծիվներ» ՀԿ նախագահ Խաչիկ Ասրյանը չմանրամասնեց, թե կոնկրետ ինչ խնդիրներ էին իրականացնում առաջնագծում: «Ոչ մի հրամանատար իրավունք չունի խոսելու այդ մասին: Ուզում եմ ի դեմս հայ զինվորների, սպաների, հրամանատարի, կամավորականների, խորին հարգանք ու երախտագիտություն եմ հայտնել նրանց ծնողներին, ովքեր ծնել ու դաստիարակել են իսկական հերոսներ, որոնք վստահ պաշտպանում են հայկական երկու պետությունների սահմանները, հայ ժողովրդի անվտանգությունը: Փառք ու պատիվ նրանց:
Կարդացեք նաև
Թշնամին չի փոխվել: Նա նույն նենգն է: Բայց, ինչպես 90-ականներին, նա այսօր նույնպես փախչում է 18 տարին նոր բոլորած հայ շարքային զինվորի, սպայի, կամավորականի առջեւից: Վստահ եմ՝ Արցախն անսասան է: Մենք մարտական դիրքերում էինք ու չէինք կարող ապրիլի 24-ին գալ Ցեղասպանության հուշահամալիր: Եկանք հիմա՝ մեր 1,5 միլիոն նահատակների հոգիներին ասելու, որ Արցախը, Հայաստանը կանգուն են եւ գտնվում են հուսալի ձեռքերում», – ասաց Խաչիկ Ասրյանը:
Աշոտ ՀԱԿՈԲՅԱՆ
