«Հայաստանի Հանրապետությունը մի շարք բարեփոխումներ է կատարել, սակայն մեր երկրի դատական համակարգը դեռևս անկախ չէ», ասված է Եվրոպայի խորհրդի գլխավոր քարտուղարության Եվրոպական երկրներում ժողովրդավարության մակարդակի, մարդու իրավունքների եւ այդ երկրներում օրենքի գերակայության մասին 2015թ. գրանցված արդյունքների վերաբերյալ զեկույցում։
Aravot.am-ն այսօր արդարադատության նախարար Արփինե Հովհաննիսյանից հետաքրքրվեց՝ ի՞նչ գործողություններ են կատարվում Հայաստանի դատական համակարգի անկախությունն ապահովելու համար:
Տիկին նախարարն ասաց.«Դատական համակարգի անկախությունն, իրականում, այն կարեւոր խնդիրներից մեկն է, որը մեր ուշադրության կենտրոնում է գտնվում:Արդարադատության նախարարությունը դատական համակարգի անկախության հետ կապված իր լիազորություններն իրականացնում է օրենքների մշակմամբ: Ի՞նչ նախագծեր ենք մշակում: Այ հիմա դատական համակարգի անկախության որակապես նոր երաշխիքների մասին կխոսենք նոր Դատական օրենսգրքի շրջանակներում»:
Մեր հարցին՝ դատավորների նշանակումը շարունակվելո՞ւ է ՀՀ նախագահի կողմից, թե՝ փոփոխություն է կատարվելու, Հովհաննիսյանն ասաց, որ փոփոխություն է կատարվելու:
Կարդացեք նաև
Նախարարի վստահեցմամբ՝ բարձրագույն դատական խորհրդի կազմը ձեւավորելու վերաբերյալ էլ փոփոխություններ են լինելու, եւ անկախության երաշխիքների ապահովման տեսանկյունից, խորհրդի կազմի կեսի նշանակումը տեղի է ունենալու Ազգային ժողովում:
Մեր այն հարցին էլ՝ դատավորների աշխատավարձերը բարձրացվեց՝ նրանց անկաշառությունն ու անկախությունն ապահովելու համար. արդյոք այս տարբերակը չաշխատեց, նախարարն ասաց՝ «Դա անկախության երաշխիքներից մեկն է»:
Մանրամասն՝ տեսանյութում
Նելլի ԲԱԲԱՅԱՆ
