Էրեբունի եւ Նուբարաշեն վարչական շրջանների ընդհանուր իրավասության առաջին ատյանի դատարանում ապրիլի 28-ին դատավոր Վարդան Գրիգորյանի նախագահությամբ շարունակվում էր «Օֆշորի գործի» քննությունը:
Դատական նիստի ընթացքում դատավորը մի քանի հարց ուղղեց ամբաստանյալ Աշոտ Սուքիասյանին. «Անընդհատ նշում եք տեխնիկաներ, եւ այլն: Եթե հիմնադրամի կապիտալ գումարի չափը տաս հազար եվրոյից չի անցել, ի՞նչ տեխնիկայի մասին է խոսքը»: Աշոտ Սուքիասյանը պատասխանեց, որ տաս հազար դոլարը բավականին մեծ գումար է. «10 հազար եվրոն միայն իմ մասնաբաժինն է, բայց այնտեղ 20 հազար եվրո է եղել»:
Դատավոր Վարդան Գրիգորյանը նկատեց, որ ցանկացած ընկերություն բացելու ժամանակ հիմնադրամի կապիտալ գումարի չափը տաս հազար եվրոն չի անցել. «Դուք անընդհատ շեշտում եք՝ տեխնիկաներ կան: Ի՞նչ տեխնիկայի մասին է խոսքը, եթե մի մեքենայի արժեքը կարող է 40-50 հազար եվրո տատանվի, ուրեմն՝ ձեր հիմնադրամը չորս-հինգ անգամ պակաս է այդ մեքենայից: Մեքենան ես համարում եմ շարժական տեխնիկա»:
Աշոտ Սուքիասյանը պնդեց, որ շատ տեխնիկա է եղել, դատավորը հետաքրքրվեց. «Օրինակ՝ ի՞նչ, պտուտակահանը տեխնիկա եք համարո՞ւմ»: Աշոտ Սուքիասյանը պատասխանեց, որ ինքը կարող է մանրամասնել, օրինակ՝ այդ տեխնիկայի թվում եղել է նաեւ լվացող մեքենա:
Կարդացեք նաև
Դատավոր Վարդան Գրիգորյանի մյուս նկատառումը Հայաստան ներկրված հումքի մասին էր. «2009 թվականի Ձեր փաստաթղթերի ուսումնասիրությամբ մաքսային ձեւակերպումներում, եթե սխալ եմ, ինձ ուղղեք, ընդամենը երկու անգամ եմ հանդիպել նշում, որտեղ նշված է ադամանդի հումք: Ընդամենը երկու անգամ: Եթե երկու անգամ է, Դուք ցանկացած բառի մեջ օգտագործում եք հումք էի բերում արտահայտությունը: Այնպես է ստացվում, որ շաբաթը երեք անգամ Դուք հումք էիք բերում»:
Աշոտ Սուքիասյանը պատասխանեց, որ այդ հումքը քիչ չէ. «2009 թվականի վերջում է դա բերվել , 2009 թվականի դեկտեմբերին հայրս մահացավ, հետո մայրս, այլեւս ի վիճակի չէի, դրանից հետո ես վարկ վերցրեցի: Այսինքն՝ ինչ հնարավոր է եղել, ես արել եմ: Աֆրիկա ամիսը մեկ գնալ հումք բերելը խաղ ու պար չէ»:
Ամի ՉԻՉԱԿՅԱՆ
