Եվրոպայի խորհրդի գլխավոր քարտուղարությունը հրապարակել է Եվրոպական երկրներում ժողովրդավարության մակարդակի, մարդու իրավունքների և այդ երկրներում օրենքի գերակայության մասին 2015թ. գրանցված արդյունքների վերաբերյալ իր զեկույցը։ Այս մասին տեղեկանում ենք Եվրոպայի խորհրդի պաշտոնական կայքից։
Եվրոպական այս կառույցի հեղինակած զեկույցում անդրադարձներ են կատարվել նաև Հայաստանին։
Մեր երկրի մասին անդրադարձների ենք հանդիպում, մասնավորապես դատական համակարգի անկախության, կիբեռանվտանգության, սահմանադրական բարեփոխումների և սոցիալական իրավունքների մասին հատվածներում։
Զեկույցի դատաիրավական համակարգի հատվածում նշվում է, որ այս ոլորտում Հայաստանի Հանրապետությունը մի շարք բարեփոխումներ է կատարել, սակայն մեր երկրի դատական համակարգը դեռևս անկախ չէ։
Կարդացեք նաև
Կիբեռանվտանգության ոլորտի մասին հատվածում նշվում է, որ Եվրոպայի խորհրդի անդամ մի շարք երկրներ որդեգրել են մի քաղաքականություն, որով փորձում են համացանցային վերահսկողություն սահմանել։ Այդ երկրների շարքում են Հայաստանը, Ադրբեջանը, Մոլդովան, Ռուսաստանը, Թուրքիան։
Հայաստանում սահմանադրական փոփոխությունների մասին անդրադարձում նշվում է, որ չնայած այդ փոփոխությունները ընդունվեցին մեր երկրում, բայց այդ համատեքստում էլ դեռևս շարունակում է լրջորեն կաղալ ժողովրդավարական մշակույթն ու քաղաքացիական հասարակության հետ երկխոսությունը։
