Այսօր ԱԺ-կառավարություն հարցուպատասխանի ժամանակ ԲՀԿ խմբակցության պատգամավոր Միքայել Մելքումյանը վարչապետ Հովիկ Աբրահամյանին հարցրեց գազի նոր սակագնի մասին: Նա նաեւ բազմաթիվ այլ հարցեր ուղղեց՝ էլեկտրաէներգիայի սակագնի, տեղեկատվական տեխնոլոգիաների, գիտության ֆինանսավորման մասին: Վարչապետն էլ ի պատասխան կատակեց՝ «հարցը նմանեցրեցի լեկցիայի»:
Վարչապետը գազի գնի հետ կապված հաստատեց տարածված տեղեկությունները: Նա հիշեցրեց, որ նախագահն այցելել էր ՌԴ. «Դրանից հետո եղավ հանձնարարական վերանայել գազի սակագինը: Դրան հաջորդեց ՌԴ կառավարության ղեկավարի այցը ՀՀ եւ ստորագրվեց համաձայնագիր, որ սահմանի վրա գազի գինը 160 դոլարից կնվազի 150-ի: Երեկ Գազպրոմ Արմենիան հայտարարել է, որ դիմելու է Հանրային ծառայությունները կարգավորող հանձնաժողովին, որ վերանայի գազի սակագինը: Թե ինչ արդյունք կլինի՝ հանձնաժողովը կքննարկի, բայց իրենք նախնական ուզում են, որ ազգաբնակչության կողմից սպառվող գազի գինը 156.000 դրամից կիջեցվի 146.000 դրամ, նաեւ 10 հազար խմ-ից ավելի սպառողների համար 277 դոլարից կիջեցվի 256-257 դոլար: Ավելի ճշգրիտ հանձնաժողովը կքննարկի»:
Վարչապետը համոզմունք հայտնեց, որ եւ գազի, եւ էլեկտրաէներգիայի սակագինը առաջիկայում կիջեցվի:
Հռիփսիմե ՋԵԲԵՋՅԱՆ
