«ԵԽԽՎ վերջին նիստում աշխատեցինք մի քանի ուղղություններով: Համար մեկ ուղղությունը ադրբեջանական ագրեսիայի ներկայացումն էր նկարների, փաստերի տեսքով, որոնք հաստատված էին Կարմիր խաչի կողմից և այս տեսանկյունից բավականին լայն տեղեկացրեցինք մեր գործընկերներին»,- այսօր «Տեսակետ» ակումբում ասաց ԱԺ ՕԵԿ խմբակցության պատգամավոր Մհեր Շահգելդյանը:
Ըստ նրա, ԵԽԽՎ-ում այս անգամ ադրբեջանցիների դիրքը բավականին թույլ է եղել, ու իրենք, օգտվելով առիթից, բարձրացրել են նաեւ Ադրբեջանի նախագահ Ալիեւի հետ կապված օֆշորային սկանդալի մասին հարցը, որ Ալիեւն անդադար բարձրաձայնում է մի միլիոն փախստականների մասին, բայց այդ ընթացքում երկրի գումարները օֆշորում են: Ըստ պատգամավորի, աշխատանքներ են իրականացվում նաեւ կուլիսներում:
Մհեր Շահգելդյանը դրական համարեց ՊՆ ոլորտում վերջին պաշտոնանկությունները և ասաց, որ դրանք պետք շարունակվեն. «Կարծում եմ՝ պետք է լինի հետաքննություն, քանի որ բազմաթիվ խնդիրներ են ծագում, որոնց մի մասը փակ քննարկման են»:
Նա նաեւ նկատեց, որ կադրային փոփոխություններից բացի անհրաժեշտ են նոր ռեսուրսների համալրում. «Անհրաժեշտ են կապի միջոցներ, ռադիոէլեկտրոնային պայքարի և անվտանգության նորագույն միջոցներ, լազերային դիտարկման և վերահսկողության գիշերային միջոցներ, անօդաչու սարքերի դեմ պայքարելու մեխանիզմներ: Իմ խորին համոզմամբ, այս ամենը կարելի է գտնել և սրանում պետք է անմիջականորեն ներգրավել այն հսկայական գիտական ներուժը, որն ունենք և սփյուռքում, և Հայաստանում»
Կարդացեք նաև
Արփինե ՍԻՄՈՆՅԱՆ
