Այսօր ԱԺ-կառավարություն հարցուպատասխանի ժամանակ ՀԱԿ խմբակցության պատգամավոր Լյուդմիլա Սարգսյանը տրանսպորտի եւ կապի նախարար Գագիկ Բեգլարյանին ասաց, որ արդեն տեւական ժամանակ է՝ քաղաքացիներից ստանում է բանավոր եւ գրավոր ահազանգեր, որ հայկական, ինչպես նաեւ ՌԴ-ից գնված եւ ՀՀ տեղափոխվող տրանզիտային պետհամարանիշներով ավտոմեքենաներով երթեւեկող ՀՀ քաղաքացիները ՌԴ տարածքում բառի բուն իմաստով «ռեկետի» են ենթարկվում ՌԴ ոստիկանների կողմից. «Ռեկետի չափը տատանվում է 400-1000 դոլար՝ կապված ավտոմեքենայի շքեղությունից: Մեր քաղաքացիները ստիպված են լինում մինչեւ վերջին կոպեկը տալ եւ մազապուրծ հասնել Հայաստան»:
Լյուդմիլա Սարգսյանը հարցրեց՝ մեր կառավարությունը տեղյա՞կ է այս ապօրինությունների մասին եւ ի՞նչ միջոցներ է ձեռնարկում՝ մեր քաղաքացիներին դրանից ազատելու համար:
Գագիկ Բեգլարյանը պատասխանեց. «Անկեղծ ասեմ, ՀՀ-ից դուրս այդ կարգի հարաբերությունների հետ կապված մենք միջամտություն չունենք»: Դրա փոխարեն նա պատմեց, թե ինչ են արել Լարսում կուտակված մեր մեքենաների խնդիրները լուծելու համար: Հետո պահանջեց՝ եթե մեզ կոնկրետ նամակով, համարով, ոստիկանների անուն-ազգանունով ներկայացնեք տվյալներ՝ անպայման մեր հանրապետության քաղաքացու կողքին կկանգնենք ու կպատժվի այն անձը, ով մեր քաղաքացու նկատմամբ իրեն ռեկետային արարքներ է թույլ տվել:
Լյուդմիլա Սարգսյանն էլ արձագանքեց, որ «ՌԴ-ում մենք նստած մարդ ունենք՝ Տիգրան Սարգսյանը». «Նա ռոտացիոն կարգով ԵԱՏՄ վարչապետն է, կարող եք նրան դիմել, թող փորձեն այդ հարցը կարգավորել»:
Կարդացեք նաև
Գագիկ Բեգլարյանը պատասխանեց. «Ես կոնկրետ ուզում եմ փաստեր, այսինքն՝ Պողոսյան Վալոդին այսինչ մեքենայով այսինչ ժամին այսինչ տեղը անհանգստացրել են: Եթե ձեզ հասել է 1-1.5 տարվա ինֆորմացիա, ասեմ, որ մենք Լարսի հետ աշխատել ենք, հայկական մեքենաների համար հատուկ կանաչ գիծ եւ կանաչ լույս է վառված: Իսկ Լարսից հեռու մնացած բոլոր դեպքերից չեմ հրաժարվում, անուն-ազգանուն բերեք՝ միջամտենք»:
Հռիփսիմե ՋԵԲԵՋՅԱՆ
