Ավելի վաղ հայտնել էինք, որ Ադրբեջանը դիմել է ՄԱԿ-ի Անվտանգության խորհրդին` տեղեկացնելով 1994 թ. Ադրբեջանի, Լեռնային Ղարաբաղի և Հայաստանի միջեւ ստորագրված զինադադարի եռակողմ համաձայնագիրը միակողմանի խզելու մասին: Ադրբեջանի այս քայլը արտակարգ եւ լիազոր դեսպան Արման Նավասարդյանն այսպես է մեկնաբանում. «Դա Ադրբեջանի վարդագույն երազանքն է` փոխել Մինսկի խումբը: Նման բան չի հաջողվի, բայց եթե ստացվի էլ, լավ չի լինի անգամ Ադրբեջանի համար: Մինսկի խումբը միակ մեխանիզմն է, որը լավ թե վատ, աշխատում է»:
Ապրիլի 27-ին «Բլից Ինֆո» մամուլի ակումբում դեսպանը փաստեց, որ Երեւան այցելած Մինսկի խմբի համանախագահներն իրենք վերահաստատեցին` իրենց գործը չէ, թե ով է նախահարձակ եղել. «Պետք է կարողանանք ազդել Մինսկի խմբի վրա եւ ասել, որ նման կերպ հարց չենք կարող լուծել: Գոնե օգնեն պահպանել խաղաղությունը տարածաշրջանում: Բաքուն հետին մտքեր ունի եւ երազում է, որ Թուրքիան մասնակցի ԼՂ հակամարտության կարգավորմանը»:
Իսկ գործընթացին մասնակցելու Իրանի ջանքերը պարոն Նավասարդյանը չի ողջունում. «Եթե Իրանն ասեր, որ միանում է Մինսկի խմբի գործունեությանը, դա հասկանալի կլիներ, բայց թե որ ուղղությամբ կշարժվի նա` գործելով Թուրքիայի եւ Ադրբեջանի եռյակում, մշուշոտ է: Բայց Իրանն այսօր փրկօղակ է` սահմանի ամրության տեսանկյունից»:
Կարդացեք նաև
Լուիզա ՍՈՒՔԻԱՍՅԱՆ
