Այսօր Երեւանի ավագանու նիստում Երեւանի քաղաքապետ Տարոն Մարգարյանն ասաց, որ քաղաքապետարանն ուսումնասիրում է զոհված զինվորների ընտանիքների սոցիալական վիճակը, որպեսզի նրանց աջակցի: Ըստ քաղաքապետի, բնակարանի կարիք ունեցող զոհված զինծառայողների այն ընտանիքներին, որոնք վարձով են բնակվում՝ կտրամադրվեն բնակարաններ:
Տարոն Մարգարյանը ֆինանսական վարչությանն էլ հանձնարարել է այլ ծրագրերի հաշվին միջոցներ գտնել, որպեսզի հերոսների ընտանիքներին ֆինանսական աջակցություն տրամադրեն: Տարոն Մարգարյանի խոսքերով, ամենայն հավանականությամբ, կկրճատվեն մշակութային միջոցառումները, որոնց գումարները կուղղվեն այս ընտանիքներին:
Կրթության վարչությանը հանձնարարվել է պարզել, թե աrաջնագծում զոհված որ հերոսը որ դպրոցում է սովորել, որպեսզի այդ դպրոցներում բացվեն անկյուններ նրանց մասին պատմող նյութերով, որպեսզի, ըստ Տարոն Մարգարյանի, ով սովորի այդ դպրոցում՝ ճանաչի եւ իմանա, թե մերօրյա ինչ հերոսներ ունենք:
Կարդացեք նաև
Քաղաքապետը նաեւ խոստացավ, որ այսուհետ, ինչ սոցիալական ծրագիր, որ քաղաքապետարանն իրականացնի, զոհված զինծառայողների ընտանիքներին կընդգրկի եւ նրանց մշտապես ուշադրության կենտրոնում կպահի:
Լուսինե ԲՈՒԴԱՂՅԱՆ
