Գարնանը շատերն են սկսում դիետաներով սնվել: Մի մասը ցանկանում է պահպանել կազմվածքը, մի մասն էլ` կորցնել ավելորդ ճարպերը: 1-ին փուլում առաջնայինը դառնում է նիհարելը եւ այդ ժամանակ սնունդը գիտակցորեն ընտրում եք ըստ որոշակի տեսակետների, որպեսզի խուսափեք արյան մեջ շաքարի պարունակության բարձրացումից։ Ցանկացած պարագայում պետք է իմանալ պարզ կանոններ, որոնք հեշտ են հիշվում: Այս կանոնների մասին նշվում է Անուշ Աղաջանյանի «Տեսակավորված սնունդ» գրքում:
1. Երբեք բաց մի թողեք ուտելու որեւէ ժամ` հատկապես ճաշը։
2. Նախաճաշը պետք է լինի առատ, ճաշը՝ սովորական, իսկ ընթրիքը՝ թեթեւ։
3. Յուրաքանչյուր ուտեստի ժամանակ ընտրեք այնպիսի կերակրատեսակներ, որպեսզի ամբողջ ուտեստի արյան շաքարի բարձրացնող ազդեցությունը մնա ցածր։
4. Ուտեստները կազմեք այնպես, որ համակցվեն լավ ածխաջրերը, սպիտակուցները եւ ճարպերը։ Կերեք միայն շատ ցածր գլիկեմիական (շաքարի պարունակություն արյան մեջ. հաճախ օգտագործվում է արյան մեջ շաքարի նորմայից բարձր պարունակությունը նշանակելու համար) ցուցանիշ ունեցող ածխաջրեր (35-ից ներքեւ), ինչպես օրինակ` բանջարեղեն, կանաչ ոսպ, ոլոռ։ Համակցեք միայն լավ ածխաջրերն ու սպիտակուցները։ Հրաժարվեք ճարպերից եւ ընտրեք ածխաջրեր, որոնց գլիկեմիական ցուցանիշը 50-ից ցածր է։
Վերջին տարբերակն այն է, որ խառնեք սպիտակուցներն ու ճարպերը։
Այսպիսով` ամեն անգամ սնվելիս ընտրություն կատարեք.
ա. կամ ուտում եք սպիտակուցներ, ճարպեր եւ ածխաջրեր` շատ ցածր գլիկեմիական ցուցանիշով,
բ. կամ ընտրում եք ածխաջրերի հետ համակցված սպիտակուցներ, որոնք ունեն փոքր-ինչ ավելի բարձր գլիկեմիական ցուցանիշ։
Կարդացեք նաև
Նախաճաշ
Նախաճաշին ամեն անգամ դուք ունեք ընտրություն ածխաջրերի եւ սպիտակուցների կամ ճարպերի եւ սպիտակուցների համակցությունների միջեւ (ինչպես նաեւ՝ ցածր գլիկեմիական ցուցանիշ ունեցող ածխաջրերի)։
Ճաշ
Ճաշը մեծ մասամբ պետք է բաղկացած լինի սպիտակուցներից, ճարպերից, ինչպես նաեւ ցածր գլիկեմիական ցուցանիշ ունեցող ածխաջրերից։
Խորհուրդ են տրվում հետեւյալ բաղադրիչները.
Սպիտակուցներ` միս, ձուկ, ձու, կաթնամթերք, ցածր գլիկեմիական ցուցանիշ ունեցող ընդեղեն։
Սիրտ-անոթային հիվանդությունները կանխելու համար պետք է գիտակցորեն պլանավորել ճարպերի ընտրությունը, որպեսզի դրանց մեջ չլինեն չափից ավելի հագեցված ճարպեր։
Հիմնական ճաշատեսակը
Որպես հիմնական կերակրատեսակ, սովորաբար ուտում եք միս, թռչնամիս կամ միս` բանջարեղենով։
Լավ կլիներ առավելությունը տրվեր ձկանը։ Ձուկը երբեք չպետք է ուտել տապակած` պաքսիմատի կամ ալյուրի մեջ թաթախած։
Ձուկը իր օգտակար հատկությունները պահպանում է խորոված կամ շոգեխաշած վիճակով եւ այդպիսով կխուսափեք ծանրամարս եւ առողջության համար վտանգավոր տապակած ճարպերից։
Դեսերտ
Պանիր եւ կաթնամթերք կամ երբեմն էլ գլիկեմիական ցածր ցուցանիշ ունեցող քաղցր անուշեղեն։
Խմիչք
Սկզբունքորեն ուտելու ընթացքում պետք է քիչ խմել, որպեսզի մարսողությունը չխանգարվի ջրիկացման եւ մարսողական հյութերի պատճառով։
Հիմնական կերակրատեսակի համար հարմար են հանքային ջուրը, թույլ սեւ կամ կանաչ, ինչպես նաեւ խոտաբույսերով թեյը, լոլիկի հյութը (հատկապես ուտելուց առաջ, ալկոհոլային խմիչքներ չեն թույլատրվում), չնայած մի փոքր բաժակ կարմիր գինին թույլատրելի է:
Ընթրիք
Ընթրիքը պետք է պարունակի շատ քիչ ճարպեր, քանի որ երեկոյան ընդունած ճարպերը (հատկապես հագեցածները) օրգանիզմը լրացուցիչ կուտակում է։ Այստեղ էլ կարող եք ընտրել սպիտակուց+ածխաջրեր համակցությունը։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
26.04.2016
