Aravot.am-ը պաշտպանության նախարարի մամուլի քարտուղար Արծրուն Հովհաննիսյանից հետաքրքրվեց, թե արդյոք նախագահն իր այդ որոշմամբ չի փաստում, որ հետախուզությունը ձախողել է իր աշխատանքը ապրիլյան 4-օրյա պատերազմին նախորդող օրերին, երբ հակառակորդն այդքան զինտեխնիկա եւ ուժեր է կենտրոնացրել շփման գծում, իսկ մերոնք հստակ տեղեկություն, թե հարձակումը որ կողմից կլինի, չեն ունեցել:
Հիշեցնենք, որ այսօր Սերժ Սարգսյանը ի թիվս պաշտպանության նախարարության մի քանի բարձրաստիճան պաշտոնյաների, պաշտոնից ազատեց նաեւ Զինված ուժերի գլխավոր շտաբի հետախուզության վարչության պետ գեներալ-մայոր Արշակ Կարապետյանին:
«Ես չեմ կարող մեկնաբանել նախագահի հրամանագիրը»,- ասաց պարոն Հովհաննիսյանը:
Մեր այն դիտարկմանը, թե փաստ է, որ տվյալ պաշտոնյան արդեն ազատվել է եւ մինչ այդ էլ թե’ հասարակական թե’ քաղաքական գործիչները համոզմունք էին հայտնում, որ հետախուզությունը լավ չի աշխատել, Արծրուն Հովհաննիսյանն ասաց` «Դա հրաման է կոնկրետ, իսկ հրամանն իրավական փաստաթուղթ է, իսկ փաստաթուղթը մեկնաբանվում է համապատասխան ընթացակարգով, ես իրավասու չեմ դա մեկնաբանել»:
Լուսինե ԲՈՒԴԱՂՅԱՆ
