«Ես ցավում եմ, որ իմ գործընկերը նման հայտարարությամբ հանդես եկավ, որովհետեւ իր հայտարարությունից հետո, ՀԱԿ խմբակցության մյուս պատգամավորների գրանցվելը եւ քննարկումներին մասնակցելն ապացուցեց, որ կոնսենսուսի կայանալ-չկայանալու որոշման տիրույթն այդտեղ է»,- Aravot.am-ի հետ զրույցում ասաց ԱԺ պետաիրավական հարցերի մշտական հանձնաժողովի նախագահ Հովհաննես Սահակյանն`անդրադառնալով Լեւոն Զուրաբյանի հայտարարությանը:
Հիշեցնենք, որ Լեւոն Զուրաբյանը հայտարարեց, թե ՀԱԿ խմբակցությունն առկախում է իր մասնակցությունը ԸՕ-ի հետագա քննարկումներին: ԸՕ-ի քննարկումներին իրենց մասնակցությունն առկախեցին միայն Լեւոն Զուրաբյանը, Արամ Մանուկյանը եւ Գագիկ Ջհանգիրյանը:
Խորհրդարանում այսօր մեկնարկած ԸՕ նախագծի քննարկումները Հովհաննես Սահակյանին հույս են տալիս մտածել, որ մինչեւ երկրորդ ընթերցում ընկած ժամանակահատվածում դարձյալ փոխհամաձայնություններ կլինեն վիճելի հարցերի շուրջ:
Հարցին`իր այդ քայլով ՀԱԿ-ն արդյոք շանտաժի ճանապարհով չի գնում, Հովհաննես Սահակյանն ասաց, որ ԸՕ-ն բացառապես իրավական հարթությունում չի, այն նաեւ քաղաքական նշանակություն ունի. «Քաղաքական կոմպոնենտը գերակշռեց այս քննարկումներում: Բայց հավատացեք, շատ ավելի լուրջ իրավական խնդիրներ եւ մեխանիզմներ կան, որոնք պետք է քննարկվեն`հասկանալու համար, արդյոք դրանք թույլ կտան քաղաքական առումով ավելի լավ ընտրություններ կազմակերպել: Քաղաքական շանտաժը, քննարկումների ծանրության կենտրոնն այլ տեղ տեղափոխելը`այլ խնդիր է»:
Կարդացեք նաև
Դիտարկմանը`չե՞ք պատրաստվում ՀԱԿ-ին խնդրել, որ վերադառնան քննարկումների, Հովհաննես Սահակյանն ասաց. «Մենք հարգում ենք մեր ընդդիմախոսներին, բայց խնդրում ենք, որ հարգանքը փոխադարձ լինի եւ որոշումները կայացնելիս ավելի խոհեմ լինեն»:
Նելլի ԳՐԻԳՈՐՅԱՆ
