ԱԺ-ում արդեն սկսվել են «Ընտրական օրենսգրքի» նախագծի քննարկումները: Կառավարության աշխատակազմի ղեկավար-նախարար Դավիթ Հարությունյանը ներկայացրեց նախագծի վերջնական տարբերակը՝ անդրադառնալով ընդդիմության բոլոր առաջարկներին:
Նա վստահեցրեց, որ եթե նույնիսկ ընդունեն մատների թանաքոտման տարբերակը՝ Վրաստանի օրինակով, դա իրեն չի արդարացնելու, որովհետեւ Վրաստանում էլ մի շարք խնդիրներ առաջացան: Այնտեղ էլ բողոքեցին, որ ուլտրամանուշակագույն լույսի փոխարեն սովորական լամպ է դրված եղել, անգույն թանաքի տեղն էլ ջուր է լցված եղել, թանաքի բաղադրությունը փոխել են եւ շուտ ցնդվող թանաք են դրել եւ այլն:
ԲՀԿ խմբակցության ղեկավար Նաիրա Զոհրաբյանը հայտարարեց, որ ի սկզբանե էլ պարզ էր՝ «4+4+4» ձեւաչափում կոնսենսուս չէր լինելու: Բայց գոնե այն հարցերի շուրջ, որտեղ կա միասնական մոտեցում, կարող են միասնական պահանջ ձեւակերպել ու ներկայացնել դոնորներին. «Ի՞նչն է մեզ խանգարում տեղամասում նկարահանել ընտրական գործընթացը: Իրար հետ հարաբերվելու միակ եզրույթը մնացել է «մարդոբոյը»: Եկեք միասնական գոնե այն հարցում, որտեղ կա կոնսենսուս, դիմենք դոնոր կազմակերպություններին»:
Դավիթ Հարությունյանն ընդունեց. «Շատ լավ առաջարկություն էր, առաջարկում եմ, որ ձեւակերպեք, մենք կմիանանք»: Նա ասաց, որ պատրաստ են 4 խնդիրների լուծման հետ կապված դիմել դոնոր կազմակերպություններին: Դրանք են՝ ընտրողների գրանցման սարքերի ձեռքբերումը, ծրագրային ապահովումը կամ մատնահետքերի համադրման ծառայության ստեղծումը, տեղամասերում տեսանկարահանումը, ամբողջ երկրում ընտրողներին անվճար ID քարտերի տրամադրումը. «Ես դեմ չեմ, եկեք ձեւակերպենք ձեր ասածը: Իշխանական թեւը պատրաստ է ստորագրել այդ թղթի տակ»:
Կարդացեք նաև
Հռիփսիմե ՋԵԲԵՋՅԱՆ
