Ամեն օր Արշակունյաց 2 հասցեում կանգառ կատարող ավտոմեքենաները, որոնք օգտվում են նշյալ հասցեում տեղակայված խանութների ծառայություններից թեկուզ մի քանի րոպեով, տուգանվում են: Տեսախցիկը տեղադրված է Գրիգոր Լուսավորիչ-Արշակունյաց խաչմերուկում:
Եթե բազմաթիվ բողոքներից հետո նրանց տուգանքը կազմում էր 5-10 հազար դրամ, ապա արդեն քանի օր է, կրկին տուգանքը 20 հազար դրամ է, ինչպես որ նախկինում էր: Այս հասցեի գործարարներն ու նրանց հաճախորդները ակտեր է, որ ստանում են:
Այսօր տնտեսվարողները Aravot.am-ի հետ զրույցում մտահոգություն հայտնեցին, որ, եթե այսպես շարունակվի, ապա իրենց բիզնեսները փակվելու վտանգի տակ են, քանի որ հաճախորդները մեկ-երկու տուգանվելով, հրաժարվում են այս խանութների ծառայություններից օգտվել:
«Հիմա ինչն է մեծ, մրցակցությունը, նրանք կգնան այնտեղ, որտեղ կարող են առանց տուգանվելու առեւտուր անել: Տնտեսվարողների խնդիրը չեն լուծում, բայց հարյուր հազարների տուգանքների են ենթարկում: Ամեն անգամ 20 հազար դրամ տուգանք են գրում, եթե հաճախորդը մի քանի րոպեով մոտենում է մեր խանութներին ապրանք գնելու: Մեզ նույնպես տուգանում են, եթե ավտոմեքենան մայթ է բարձրանում: Մեծ ապակիներ, կահույք եւ այլ ապրանքներ են, ինչպե՞ս հասցնեն ավտոմեքենայի մոտ, եթե այն կանգնեցնեն 50-100 մետր այն կողմ: Այս փողոցում այլ կերպ հնարավոր էլ չէ. որքան էլ վարորդն ուզի, չի կարող մեքենան փողոցում կանգնեցնել»:
Կարդացեք նաև
Տարիներ շարունակ պետբյուջե հարկուտուրքեր վճարած 11 տնտեսվարող, ուր ասես որ չեն դիմել: Չկա մի պետական կառույց, որը կզբաղվի գործարարների խնդրով: Քաղաքապետարանն ասում է` մեր գործը չէ, եւ որ խնդիրը ճանապարհային երթեւեկության անվտանգության մասին օրենքի հետ է կապված: Ոստիկանությունն էլ պնդում, թե օրենքի պահանջն է, իրենք ոչինչ անել չեն կարող:
Մինչ պետական գերատեսչությունները մեկը մյուսի վրայից «գցում» են պատասխանատվությունը, գործարարներին հարյուր հազարների տուգանքներ են գալիս: Տնտեսվարողները պատրաստվում են նամակով դիմել վարչապետին, որպեսզի գոնե նա մատնանշի այն կառույցը, որտեղ կարող են այս խնդրով զբաղվել եւ գործարարներին ազատել արհեստական ստեղծված խոչընդոտից:
Լուսինե ԲՈՒԴԱՂՅԱՆ
