ՀՀ պաշտպանության նախկին նախարար Վաղարշակ Հարությունյանն ապրիլի 25-ին «Դիալոգ» մամուլի ակումբում նաեւ անդրադարձավ ՀՀ պաշտպանության նախարար Սեյրան Օհանյանի` երեկ արված հայտարարությանը, թե ոչ մի թիզ հող չենք հանձնելու. «Նախարարն ասում է որպես Պաշտպանության նախարար, ոչ թե որպես պետություն: Իսկ նախագահն ասում է` հիմա բանակցելու մասին խոսք չի կարող գնալ, մինչեւ չվերադառնանք վստահության մթնոլորտին: Նույնը ասել է նաեւ Լավրովը: Նա ասաց` պետք է ստեղծվեն նախապայմաններ, որպեսզի կսկսվեն բանակցությունները, եւ այսօր մենք պետք է մտածենք, թե ինչպես ամրապնդենք զինադադարի ռեժիմը, մշակենք մեխանիզմներ, որոնք թույլ կտան պարզել` որ կողմն է խախտել հրադադարը: Իմ կանխատեսմամբ` համանախագահները կաշխատեն այդ ուղղությամբ:
Այստեղ հայկական կողմն առավելություն ունի, որովհետեւ Ադրբեջանը ցույց տվեց, որ որեւէ միջազգային պարտավորություն չի կատարում: Կարծում եմ` հայկական կողմը մոտակա ժամանակներում բանակցությունների չի գնա»,-նկատեց Հարությունյանը:
Իսկ թե ի՞նչ է նշանակում եւ ենթադրում Մադրիդյան սկզբունքների համաձայն` Ադրբեջանին տարածքներ զիջելը, Հարությունյանն ասաց. «Երբ մենք հանձնում ենք մեկ կամ մի քանի շրջան, նշանակում է, որ շփման գիծը մեծանում է, դա էլ ենթադրում է ռեսուրսներ եւ բանակի քանակի ավելացում: Բացի այդ, ստացվում է, որ հանձնում ենք այն դիրքերը, որոնք ուժեղացրել ենք 22 տարի: Իսկ քաղաքներն ադրբեջանական հրետանու համար հասանելի են դառնում»:
Կարդացեք նաև
Այլ մանրամասները` տեսանյութում:
Լուիզա ՍՈՒՔԻԱՍՅԱՆ
