ՀՀ ԱԺ փոխնախագահ Էդուարդ Շարմազանովը ապրիլի 25-ին ընդունել է Իրաքի Հանրապետության խորհրդարանի արտաքին հարաբերությունների մշտական հանձնաժողովի նախագահ Հասան Համդանին եւ նրա գլխավորած պատվիրակությանը:
ԱԺ փոխնախագահ Էդուարդ Շարմազանովը ողջունել է պատվիրակության այցը Հայաստան, ովքեր այստեղ էին՝ մասնակցելու «Ընդդեմ ցեղասպանության հանցագործության» երկրորդ գլոբալ համաժողովին: Էդուարդ Շարմազանովը կարեւորել է քուրդ եւ եզդի ժողովուրդների հետ հարաբերությունների զարգացումը եւ համատեղ պայքարը ցեղասպանությունների կանխարգելման կարեւորագույն գործում` նշելով, որ ավելի քան մեկ դար առաջ Թուրքիայի կողմից հայ ժողովրդի նկատմամբ իրականացված ցեղասպանությունն այսօր շարունակվում է արդեն Մերձավոր Արեւելքում: Անդրադառնալով Թուրքիայի եւ «Իսլամական պետության» քաղաքականությանը տարածաշրջանում, ԱԺ փոխնախագահը նկատել է, որ այսպես կոչված «Իսլամական պետությունը» որեւէ ընդհանրություն չունի իսլամի հետ: Նա նշել է, որ տարածաշրջանում կան երկրներ, որոնք փորձում են ԼՂ հակամարտությանը տալ կրոնական երանգ, ինչը որեւէ աղերս չունի իրականության հետ:
ԱԺ փոխնախագահը մտահոգություն է հայտնել Մերձավոր Արեւելքում քուրդ եւ եզդի ժողովուրդների նկատմամբ իրականացվող գործողությունների առնչությամբ եւ դատապարտել ցեղասպան քաղաքականության բոլոր երեւույթները:
Շնորհակալություն հայտնելով ընդունելության համար՝ Իրաքի խորհրդարանի արտաքին հարաբերությունների մշտական հանձնաժողովի նախագահ Հասան Համդանն ԱԺ փոխնախագահին է փոխանցել Իրաքի խորհրդարանի ողջույնները եւ զորակցություն հայտնել ավելի քան 100 տարի առաջ հայ ժողովրդին պատուհասած Ցեղասպանության կապակցությամբ եւ նշել, որ լավ են հասկանում հայ ժողովրդի ցավը, քանի որ այսօր այդ ցեղասպան քաղաքականությունն իրականացվում է Մերձավոր Արեւելքում:
Կարդացեք նաև
Հանդիպմանն անդրադարձ է եղել նաեւ ազգային փոքրամասնությունների հարցին. Էդուարդ Շարմազանովը տեղեկացրել է, որ ՀՀ-ում իրականացված սահմանադրական փոփոխությունների արդյունքում հաջորդ խորհրդարանում ներկայացված կլինեն նաեւ եզդի, քուրդ, ասորի եւ ռուս ազգային փոքրամասնությունների ներկայացուցիչները:
Պատվիրակության անդամները շնորհակալություն են հայտնել հայրենակիցների նկատմամբ Հայաստանի իշխանությունների կողմից ցուցաբերվող հոգածության եւ երկրորդ հայրենիք պարգեւելու համար: Զրուցակիցները կարեւորել են հայ եւ քուրդ ժողովուրդների միջեւ բարեկամության ամրապնդումն ու պատմությունը նոր էջից սկսելու գաղափարը՝ համամիտ լինելով, որ պատմության սեւ էջերը հետեւանք են եղել Օսմանյան Թուրքիայի վարած քաղաքականության:
ՀՀ ԱԺ հասարակայնության եւ տեղեկատվության միջոցների հետ կապերի վարչություն
