Գերմանիայում գործող թուրքական «Միություն Ընդդեմ Ցեղասպանության» կազմակերպության ներկայացուցիչ Մահմութ Ուզունին Հայաստան է եկել հինգ նուռ ձեռքին: «Նոյյան տապան» մամուլի սրահում լրագրողների հետ հանդիպմանը Մահմութ Ուզունին ներկայացրեց, որ այդ 5 նռերը բերված են Պերուից, քանի որ այդ նռան սերմերը ժամանակին հայերն էին Արևմտյան Հայաստանից տարել Լատինական Ամերիկա: Ըստ պարոն Ուզունիի` հայկական հարցի լուծումն այս հինգ նռան մեջ է: Նա մանրամասնեց. «Գիտենք, որ հայ ազգն ունի հինգ խնդիր` Արևմտյան Հայաստան, Արևելյան Հայաստան, որ պետական միավոր է, Արցախ, Նախիջևան և Ջավախք: Ուստի հայ ազգի բովանդակ երկիրը հինգ մասի է բաժանված, որից չորսը բռնազավթված է»:
Նշենք, որ Մահմութ Ուզունին երկար տարիներ իբրև քաղաքական բանտարկյալ թուրքական զնդաններում է եղել, խոշտանգվել, այժմ բնակվում է Լոնդոնում: Քուրդ գործիչը խոստովանեց, որ քրդերն ուղղակի մասնակիցն են եղել Հայոց ցեղասպանության ու հայերի բռնազավթմանը: Այնուհետև հայտարարեց. «Ամաչում եմ իմ նախնիների արարքների համար և իմ անունից ներողություն խնդրում, որ քրդերը մասնակցել են այդ ամենին:
Պարոն Ուզունին ներկայացրեց իրենց հայտարարությունը, որում դատապարտվում է Թուրքիայի և Ադրբեջանի վարած քաղաքականությունը: Հայտարարությունում մասնավորապես նշված է. «Մեր բողոքն ենք հայտնում ընդդեմ քրեական հանցագործ, ցեղասպան Թուրքիայի Հանրապետության և նրա հանցակից Ադրբեջանի դեմ: Մեր բողոքն ենք հայտնում ընդդեմ նրանց ուղղորդող ու կառավարող ցեղասպան գաղափարախոսության, ընդդեմ նրանց նյութական և բարոյական աջակցություն ցուցաբերողների և նրանց զինող դաշնակիցների:
Մեր ձեռքերը ցեղասպանության ժխտողների օձիքներին է, քանի որ ժխտումը ցեղասպանության շարունակությունն է: Ե՛տ քաշեք ձեր ձեռքերը Արցախի Հանրապետությունից, ճանաչե՛ք 1915-ի ցեղասպանությունը և զբաղվե՛ք դրա հետ կապված բոլոր պարտավորություններով, ներողությո՛ւն խնդրեք ցեղասպանված ազգերից` հայերից, ասորիներից, Պոնտոսի հույներից և եզդիներից»:
Կարդացեք նաև
Հարցին` արդյոք մեծաթի՞վ են այն քրդերը, որոնք ընդունում են իրենց նախնիների մեղսակցությունը հայերի ցեղասպանության իրականացման հարցում, պարոն Ուզունին պատասխանեց. «Արձանագրենք, որ շատ քիչ մարդ է ինձ նման մտածում: Հատկապես քրդերի շրջանում իրենց պապերի կատարած վայրագությունն ընդունելի չէ, քչերն են փորձում առերեսվել»:
Մահմութ Ուզունին տեղեկացրեց նաև Եվրոպայի 4 քաղաքներում տեղի ունեցած «1 թուրք, 1 քուրդ, 1 հայ խոսում են 1915–ի մասին» խորագրով համաժողովների մասին: Նա փաստեց, թե նորություն է այն, որ այլևս չեն խոսում Հայոց ցեղասպանության ճանաչման մասին, այլ հիմնական քննարկման թեման փոխհատուցման հարցն է:
Նա հավելեց. «Հարյուր տարին հերիք էր հոլովել ճանաչումը, հիմա արդեն փոխհատուցման մասին խոսելու ժամանակն է»:
Տաթև ՀԱՐՈՒԹՅՈՒՆՅԱՆ
Լուսանկարը` «Նոյյան տապան»-ի
