Հայ Յեղափոխական Դաշնակցության Բյուրոյի Հայ դատի եւ քաղաքական հարցերի գրասենյակի տնօրեն Կիրո Մանոյանի մեկնաբանմամբ, քառօրյա պատերազմը մեզ հեռացրեց բանակցություններից:
«Ադրբեջանը ձախողեց ռազմական ճակատում եւ ամեն գնով փորձեց բանակցությունները տապալել, ինչ-որ առումով դա նրան հաջողվեց: Ադրբեջանը փորձում է այսօր ասել, որ զինադադարի ռեժիմը այլեւս 1994 թվականի պայմանագրով չի որոշվում, այլ քառօրյա պատերազմից հետո ձեռք բերված վերջին բանավոր պայմանավորվածությամբ: Ադրբեջանը փորձում է այս կռիվներից հետո ԼՂՀ-ն դուրս գցել հավանական բանակցությունների գործընթացից՝ հայտարարելով, երկկողմանի է պայմանավորվածությունը: Ադրբեջանը դժգոհ է բանակցային գործընթացից, որովհետեւ կարեւոր սկզբունք կա՝ ժողովուրդների ինքնորոշման մասին, դա յուրովի է մեկնաբանում՝ ինքնորոշումը պետք է լինի Ադրբեջանի սահմաններում»,- այսօր «Արմենպրես» ակումբում ասաց Կիրո Մանոյանը:
Ըստ նրա, Ադրբեջանի նպատակը բանակցությունների միջավայրն ու ատյանները փոխելն է, քանի որ դժգոհ է Մինսկի խմբի համանախագահների առաջարկներից. «Խաղաղ կարգավորումը չի նշանակում միայն բանակցությունները, կարող է լինել նաեւ ԼՂՀ անկախության միջազգային ճանաչում:Մոտ ապագայում բանակցություններ պետք չէ ակնկալել, Ադրբեջանը պատերազմով փորձեց դիվանագիտություն վարել, թեեւ այն շարունակություն չունի»:
Անդրադառնալով ԼՂՀ հակամարտության կարգավորման հարցում տարածքների փոխզիջման հավանականությանը, պարոն Մանոյանն ասաց. «Զարմանում եմ, երբ զարմանում եք տարածքների փոխզիջումից: 2009-ից ԵԱՀԿ Մինսկի խմբի համանախագահները հինգ անգամ հայտարարել են՝ միջազգային իրավունքի սկզբունքների հիման վրա ինչ են առաջարկում կողմերին, որոնց մեջ կա նաեւ որոշ տարածքների վերադարձը, որը ՀՀ-ն ընդունում է բանակցությունների հիմք… Դրա մասին կարելի է խոսել բանակցությունների բովանդակության մեջ, բայց երբ բանակցությունները չկան, ուրեմն չկա նաեւ նման հարց»:
Կարդացեք նաև
Արփինե ՍԻՄՈՆՅԱՆ
