Ցեղասպանության զոհերի հիշատակին Ծիծեռնակաբերդ մարդկանց հոսքը վաղ առավոտից է սկսել:
Արդարադատության նախկին նախարար Գեւորգ Դանիելյանի գնահատմամբ, ցեղասպանությունից 101-րդ տարի անց Թուրքիայի դիրքորոշման ու քաղաքականության հարցում չկան փոփոխություններ
« Թուրքիան հաճախ հայտարարում է, թե պատրաստ են իրենց արխիվները մեզ տրամադրել, որեւէ խոչընդոտ չեն ստեղծելու, պատրաստ են փորձել համատեղ ուժերով, պատմաբանների հետ քննարկել ու եթե համոզվեն՝ տեղի է ունեցել ցեղասպանություն, կընդունեն, կշարժվենք առաջ:
Դա այդքան էլ այդպես չէ, մեծ կեղծիք կա դրա տակ: Նույն Թուրքիան հայտարարում է, որ 1919-20 թթ քրեական գործերի նյութերն այլեւս արխիվներում չեն պահպանվել, ոչնչացվել են, ավելին՝ հայտարարություն է տարածել, որ քրեական գործերի նյութերը, ամենայն հավանականությամբ, հափշտակվել են հայերի կողմից: Ի սկզբանե, հայտարարում են, որ շատ նյութեր կան, բայց քրեական գործերի դատավճիռների նյութերը չկան:
Կարդացեք նաև
Մինչդեռ Վատիկանի արխիվներում պահպանվել են շատ դատավճիռներ: Դատավճիռներում բառացի ոչ մի խոսք չկա ցեղասպանության մասին, բայց բովանդակային կտրվածքով կան: Դատավճիռներում այդ իրադարձությունների նկարագիրը դասական իմաստով հենց ցեղասպանություն է: Ուրիշ բան, որ դրա մասին քիչ են խոսում, փորձում թաքցնել, բայց դրանից ոչինչ չի փոխվում:
Դատավճիռները վկայում են, որ դրանք ոչ թե պատահական պատերազմական գործողություններով թելադրված սպանություններ են եղել, այլ կոնկրետ շարժառիթներով: Տեղաշարժն էլ տեղի է ունեցել ոչ թե մարդկանց անվտանգությունը ապահովելու նկատառումով, այլ նրանց հնարավորինս ավելի դյուրին եղանակով ոչնչացնելու նպատակով: Դա ֆիքսվում է դատավճիռներով»:
Նա նաեւ նկատեց, որ պետք չէ սպասել, որ ԱՄՆ նախագահ Օբաման արտաբերի ցեղասպանություն բառը. «Դա հենց հայոց եղեռն է: Մարդկության դեմ ուղղված ինքնատիպ հանցագործություն, որը բոլոր հատկանիշներով նույնացվում է ցեղասպանության հետ»:
Հարցազրույցի մանրամասներն ավելի ուշ
Արփինե ՍԻՄՈՆՅԱՆ
