«Ընդդեմ ցեղասպանության հանցագործության» երկրորդ գլոբալ ֆորումին ներկա էր նաեւ, մարդու իրավունքների եզդի պաշտպան Նադյա Մուրադը: Նա լրագրողների հետ զրույցի ընթացքում ասաց, որ իր Իսլամական պետության գերությունում իր վերապրածից հետո իր միակ երազանքն այն է, որ այլեւս ոչ ոք չզգա այն, ինչ ինքն է զգացել:
Նադյա Մուրադը ասաց, որ ինքը Մանսուրում է գերության մեջ մնացել, կարողացել է գտնել իսլամական հագուստ եւ բարի մարդկանց օգնությամբ թաքցնելով դեմքը փախչել: Ճամբարում հայտնվելուց հետո նրան հաջողվել է տեղափոխվել Գերմանիա, որտեղ էլ այժմ ապրում է: Իսլամական պետության զինյալները սպանել են նրա վեց եղբայրներին, իսկ մայրը եւ զարմուհին, որոնք փորձել են փախչել, պայթել են ականի վրա: Նրա երկու քույրերը եւ երեք եղբայրներին հաջողվել է փրկվել, նրանք այժմ ճամբարում են:
«Շուրջ 10 հազար եզդիներ գերի են վերցվել եւ սպանվել են ահաբեկիչների կողմից: Իսկ նրանք, ովքեր չեն սպանվել, մահացել են կիզիչ արեւից: Նրանք Սիրիայի եւ Իրաքի սեւ շուկաներում վաճառել են մեր կանանց եւ երեխաներին, բռնաբարել են եւ մեկ տղամարդուց մյուս տղամարդու ձեռքն են փոխանցել»,- ասաց նա:
Նադյա Մուրադը նկատեց, որ այն, ինչ իրենք վերապրել են, տեղի է ունեցել ամբողջ աշխարհի աչքի առաջ. «1.5 տարուց ավել է, որ մեր ազգը տառապում է, բայց ոչինչ չի արվում, որպեսզի նրանց օգնություն ցուցաբերեն: Մի՛ փակեք ձեր աչքերը մարդկային ողբերգությունների վրա, օգնե՛ք մարդկանց, անմեղ մարդիկ չպետք է տառապեն»:
Կարդացեք նաև
Անդրադառնալով Հայոց ցեղասպանությանը՝ նա նկատեց, որ եթե այն ճանաչվեր, ապա նրան հաջորդող բոլոր ցեղասպանությունները տեղի չէին ունենա: Ըստ նրա, ճանաչումն է, որ կարող է կանխարգելել ցեղասպանության կրկնությունը:
Ամի ՉԻՉԱԿՅԱՆ
