Թուրքիայի արտաքին գերատեսչությունը հայտարարություն է տարածել, որտեղ անդրադարձ է կատարվում ԱՄՆ նախագահ Բարաք Օբամայի անունից՝ Հայոց ցեղասպանության 101-ամյակի կապակցությամբ հրապարակված ուղերձին։ Այս մասին տեղեկացնում է թուրքական «Հաբերլեր» լրատվական գործակալությունը։
Հիշեցնենք, որ ԱՄՆ նախագահի անունից տարածված ամենամյա ուղերձի մեջ Հայոց ցեղասպանությունը, կրկին կոչվել էր Մեծ եղեռն և կրկին չէր օգտագործվել ցեղասպանություն բառը՝ ինչպես եղել է Օբամայի նախագահության նախորդ տարիներին ։
ԱՄՆ նախագահի ուղերձը բողոքի պատճառ է դարձել Թուրքիայում, իսկ այդ երկրի ԱԳ նախարարությունը հայտարարություն է տարածել, որտեղ ԱՄՆ-ին կոչ է արել անկողմնակալ լինել Հայոց ցեղասպանության հարցում, հաշվի առնել բոլոր կողմերի ցավերը, որդեգրել ողջամիտ և կառուցողական մոտեցում։
Թուրքիայի արտաքին գործերի նախարարության տարածած գրավոր հայտարարության մեջ մասնավորապես ասվում է. «1915թ. դեպքերի վերաբերյալ 2016թ. ապրիլի 22-ին ԱՄՆ նախագահ Օբամայի հրապարակած ուղերձը նոր օրինակ է, թե ինչպես կարող են միակողմանի գնահատվել և ներկայացվել Առաջին համաշխարհային պատերազմի տարիների ընթացքում տեղի ունեցած ցավալի իրադարձությունները»։
Կարդացեք նաև
Մեր հարևան պետության արտաքին գերատեսչությունը կոչ է անում նաև պատմությունը թողնել պատմաբաններին, նշելով, որ. «Փաստ է, որ մինչև այժմ որևէ մեկին օգուտ չի բերել պատմության ընթացքում տեղի ունեցած դժբախտությունները քաղաքականությանը ծառայեցնելը»։
