Ինչպես տեղեկացրել ենք, Շիրակի մարզից ընտրված պատգամավոր Արման Սահակյանը գյումրեցի անօթեւան ընտանիքներին տնակներից փրկելու Հայկ Բարսեղյանի հեղինակած «SOS Գյումրի» ծրագրին մի բնակարան էր նվիրել ու նախընտրել այն տրամադրել զինվորականի ընտանիքի: Այսօր պարզվեց, որ բնակարանը տրամադրել են հայրենիքի համար հերոսաբար նահատակված 33-ամյա փոխգնդապետի՝ Ալեքսան Առաքելյանի ընտանիքին: Հիշեցնենք, որ գյումրեցի հերոսը կնոջ ու իր երկու մանկահասակ զավակների հետ տեղափոխվել էր բնակության Արցախ ու հայրենի քաղաքում տուն չուներ: Թեեւ նա դիմում էր ներկայացրել պաշտպանության նախարարություն Գյումրիում բնակարան ստանալու ակնկալիքով: Կինը՝ Մերին, Ջեբրայիլի իրենց ծառայողական բնակարանը թողնելուց հետո բնակության էր տեղափոխվել ամուսնու հայրական տանը՝ ամուսնու ծնողների, եղբոր ընտանիքի, տարեց տատ ու պապի հետ: Երիտասարդ կինը չի էլ պատկերացնում, թե ինչպես է մեծացնելու իր երկու երեխաներին:
Պետության փոխարեն, այսօր մեր հերոսի ընտանիքին բնակարան նվիրեց ԱԺ պատգամավորն ու «SOS Գյումրի» խումբը՝ այսպես հայտնելով իրենց երախտագիտությունը հայրենիքի համար կյանք տված փոխգնդապետին:
Գյումրու դրամատիկական թատրոնի պրոդյուսեր Տիգրան Վիրաբյանը, իր ֆեյսբուքյան էջում, տեղադրելով փոխգնդապետի ու նրա ընտանիքի նկարները, հայտնում է. «Լավ լուր Գյումրիից… Քառօրյա պատերազմում հերոսաբար ընկած գյումրեցի Ալեքսան Առաքելյանի ընտանիքը այսօրվանից նոր բնակարան ունի…
Կարդացեք նաև
Ինչպես նախօրոք տեղեկացրել էին «SOS Գյումրի» ծրագրի համակարգողները, ծրագրի շրջանակներում ԱԺ պատգամավոր Արման Սահակյանը պատրաստակամություն էր հայտնել նվիրել մեկ բնակարան: Հաշվի առնելով վերջին զարգացումները՝ « SOS Գյումրի» խումբը եւ ԱԺ պատգամավոր Արման Սահակյանը համատեղ որոշում են կայացրել բնակարանը նվիրել Ալեքսան Առաքելյանի ընտանիքին: Հիմա Ալեքսանի ընտանիքը ժամանակավորապես ապրում է Ալեքսանի հայրական տանը, որտեղ բնակվում են 10 անձ: Համապատասխան փաստաթղթային ձեւակերպումներից հետո ընտանիքը կարող է տեղափոխվել նոր բնակարան»:
Նշենք, որ մեր հերոսը, կուրորեն սիրելով Արցախը, ասել է.«Ես չեմ կշտանա իմ Արցախից, սուրբ է այնտեղ ամեն բան…Ջեբրայիլում ավազի ամեն մի հատիկ ոսկի է, երբ այնտեղ շնչում եմ, օդը լրիվ թոքերիս հասնում է, գլուխս այնտեղ երբեք չի պտտվում, որ Գյումրի եմ գալիս, կիսատ եմ դառնում, որովհետեւ սիրտս մնում է այնտեղ՝ Ջեբրայիլում»:
Նունե ԱՐԵՎՇԱՏՅԱՆ
