ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Էլինար Վարդանյանը ապրիլի 22-ին ընդունել է Հայաստանի Հանրապետությունում Եվրոպական միության պատվիրակության ղեկավար, դեսպան Պյոտր Սվիտալսկուն եւ ԵՄ քաղաքական պատասխանատու Անդրեա Խալուպովային:
Հանդիպմանը քննարկվել են ՀՀ կառավարության հեղինակած «Հասարակական կազմակերպությունների մասին» օրենքի նախագծին վերաբերող մի շարք հարցեր: Հանձնաժողովի նախագահ Էլինար Վարդանյանը տեղեկացրել է, որ նախագիծը հանձնաժողովի դրական եզրակացությամբ ընդգրկված է ԱԺ հինգերորդ գումարման իններորդ նստաշրջանի օրակարգի նախագծում. նախատեսվում է, որ այն առաջիկայում կընդգրկվի նաեւ ԱԺ քառօրյա նիստերի օրակարգի նախագծում: Հանձնաժողովի նախագահի խոսքով՝ օրենսդրական նախաձեռնության վերաբերյալ տեղի են ունեցել քննարկումներ, հաշվի են առնվել բոլոր կառուցողական առաջարկներն ու դիտողությունները, արդյունքում՝ նախագիծն այս տեսքով ընդունելի է շահագրգիռ բոլոր կողմերի համար: Ըստ տիկին Վարդանյանի՝ դեռեւս կան տարընթերցումների տեղիք տվող որոշ դրույթներ, որոնց հստակեցման քննարկումները շարունակվում են:
Շնորհակալություն հայտնելով ընդունելության համար՝ պարոն Սվիտալսկին կարեւորել է նախագծի արագ ընդունումը, քանի որ դրանից է կախված ԵՄ մի շարք ծրագրերի իրականացումը Հայաստանում: Նա բարձր է գնահատել «Հասարակական կազմակերպությունների մասին» ՀՀ օրենքի նախագիծը, նշելով, որ դրանում պահպանվել են եվրոպական չափանիշները, ի տարբերություն ԵԱՏՄ որոշ երկրների, որտեղ փորձ է արվել նվազեցնելու հասարակական կազմակերպությունների դերը:
ԵՄ դեսպանը նաեւ անհրաժեշտ է համարել նախագծում ընդգրկել դրույթ, որը հասարակական կազմակերպությունների համար կապահովի դատական արդարադատության մատչելիությունն ու դատարան դիմելու հնարավորությունը, ինչի կապակցությամբ հանձնաժողովի նախագահ Էլինար Վարդանյանը տեղեկացրել է, որ այդ հարցը գտնվում է հանձնաժողովի ուշադրության կենտրոնում:
Հանդիպման ընթացքում անդրադարձ է եղել նաեւ ՀՀ ընտրական նոր օրենսգրքի նախագծին: ՀՀ-ում ԵՄ պատվիրակության ղեկավար, դեսպան Պյոտր Սվիտալսկին անհրաժեշտ է համարել շարունակել երկխոսությունը քաղաքական ուժերի միջեւ: Նա հույս է հայտնել, որ ՀՀ ընտրական նոր օրենսգիրքը կապահովի արդար եւ թափանցիկ ընտրությունների անցկացումը:
ՀՀ ԱԺ
