ԱԺ պետաիրավական հարցերի հանձնաժողովում Ընտրական օրենսգրքի նախագիծն է քննարկվում: Կառավարության աշխատակազմի ղեկավար-նախարար Դավիթ Հարությունյանը ներկայացրեց նախագծի վերջնական տարբերակը:
Էդմոն Մարուքյանի հարցին, թե ինչո՞ւ այնուամենայնիվ, միասնական փաստաթուղթ չեն ուզում ընդունել՝ գրանցման համար, 3 փաստաթղթերը կխճճեն՝ Դավիթ Հարությունյանը պատասխանեց, որ տեխնիկապես չեն կարող միասնական փաստաթղթով քվեարկություն կազմակերպել:
Էդմոն Մարուքյանի խոսքերով՝ «Սահմանադրության խախտում կա օրենսգրքում՝ միավորումներ կազմելու հետ կապված: Չի կարող օրենսդիրը սահմանափակել եւ ասել, որ չպետք է 3 կամ 4 կուսակցություն միանան իրար: Արգելափակում ու սահմանափակում է դրվում»:
Դավիթ Հարությունյանը պատասխանեց՝ կոալիցիան այն է, որը ստանում է 50+1 տոկոս, դուք ասում եք՝ այնտեղ 3 կուսակցությունում 50+1 տոկոս ստացան, մենք այստեղ 4-ով էլ էինք ուզում 50+1 տոկոս ստանալ. «Թվաբանությունը խոսում է այն մասին, որ 100-ի մեջ չի լինում 2 հատ 50+1: Սա առաջին դասարանում էլ բոլորը գիտեն»:
Կարդացեք նաև
Ըստ Էդմոն Մարուքյանի, անհավասար պայմաններ են ստեղծվում իշխող ՀՀԿ-ի եւ մյուս կուսակցությունների միջեւ. «Սահմանադրությունն ասում է՝ համամասնական ընտրակարգ, չի ասում՝ որ տարբերակը: Դուք վերցրել եք մի տարբերակ, որը կարող է 20 երկրում կիրառվում է, բայց այդ 20 երկրում ՀՀ-ի պես ռեկտորը չի օգտագործում իր վարչական ռեսուրսը, լծակը՝ ընտրական գործընթացներում, հետեւաբար պետք չի հղում անել այլ երկրներին: Ես ընտրատեղամասում որեւէ մտահոգություն չունեմ, ինձ չի հետաքրքրում, թե այդտեղ ինչ է ներդրվում, որովհետեւ վերջին տարիներին ինչ տեղի է ունենում՝ լինում է ընտրատեղամասից դուրս»:
Դավիթ Հարությունյանը նաեւ չհամաձայնեց, որ հեգնում են, թե ինչ-որ մի 20 երկրի փորձն է. «Սրանք Եվրոպայի առաջադեմ երկրներն են»:
Հռիփսիմե ՋԵԲԵՋՅԱՆ
