«Իշխանությունների կողմից կատարվեց այն, ինչ պետք է կատարվեր: Կիրառվեցին այն բոլոր տեխնոլոգիաները, որոնք տարիներով կիրառվել են: Ընտրակաշառք էին բաժանում, որոշ տեղերում՝ կարուսելներ, մեծ ճնշումներ պետական հիմնարկների աշխատողների վրա, ոչ մի բան չի փոխվել»,- այսօր «Հայելի» ակումբում ասաց Սասուն Միքայելյանը:
Անդրադառնալով ընտրությանը հաջորդած միջադեպի լուրերին, պարոն Միքայելյանն այսպես մեկնաբանեց. «Հաջորդ օրը երեկոյան նրանց կողմնակիցները ցանկություն են ունեցել հյուրասիրել մեզ մեր բակում, էթիկայի նորմերից ելնելով՝ հակահյուրասիրեցինք, բարձեցին տարան»:
Հարցին՝ ինչու ընդունեցին ընտրության արդյունքները, պարոն Միքայելյանն ասաց. «Շատ բան է արձանագրվել, կայքերով է դրվել ինչ խախտումներ են եղել, մենք պաշտպանել ենք մեր քվեն, դա չի նշանակում, որ ընտրակաշառք չի եղել, խոշոր գումարի բաժանում է եղել: Այս տարիների ընթացքում կեղեքել են քաղաքացիներին, հատկապես՝ հրազդանցուն, հիմա բաժանում են, որ հետո էլի հավաքեն:
Հրազդանում փոփոխություններ են պետք, չի կարող 14 տարվա քաղաքապետը, որ Հրազդանը հասցրել է այդ վիճակին, նորից մնա Հրազդանում, որովհետեւ մի հինգ տարի էլ մնա, Հրազդանից բան չի մնա: Հրազդանում կարողացել են որոշ մարդկանց ուղեղները լվանալ, գալիս է ընտրությունը, մարդիկ գնում են գումարին:
Կարդացեք նաև
Գերադասում են հինգ օր կուշտ հաց ուտել, մի հինգ տարի բողոքել: Շուտով ամենամեծ բողոքողները կլինեն այն մարդիկ, որոնք գումար են վերցրել ու անգաղափար ձայն են տվել հակառակորդին՝ Արամ Դանիելյանին»:
Սասուն Միքայելյանի համար հասկանալի չէ՝ ինչ մասնակցություն է ունեցել ընտրությունների Գագիկ Ծառուկյանը, որովհետեւ նրա բարեգործական ավտոբուսներով մարդիկ են եկել-գնացել Հրազդան:
«Թե ուզում էին վախեցնել ինձ, ինքը լավ գիտի, որ ես այդ կատեգորիայի մեջ չկամ: Արմեն Աշոտյանը, լինելով պատասխանատուն տեղում, երբ ասում էր մեկ տարի առաջ՝ Գագիկ Ծառուկյանի ծնողները պետք է պատասխան տան, որ նման ժառանգ են ունեցել, իմ կարծիքով ինքը ոչ մի բարոյական իրավունք չուներ այդ ընտրություններին մասնակցել»:
Արփինե ՍԻՄՈՆՅԱՆ
