Այս պահին կառավարության շենքի մոտ բողոքի ակցիա են անում Արարատի մարզի Քաղցրաշեն եւ հարակից գյուղերի բնակիչները: Նրանք պահանջում են վճարել դեռ անցյալ տարի մթերած խաղողի գումարները:
Գյուղացիների ներկայացմամբ՝ արդեն 8 ամիս է, Պռոշյանի, Քաղցրաշենի եւ Տափերականի գործարանները չեն վճարում գյուղացիների գումարները: Քաղցրաշենցիներն ասում են, որ իրենք բանկերին հսկայական գումարներ են պարտք, որոնց հսկայական տոկոսներ են գումարվում, քանի որ գործարանը իրենց պարտքերը չի մարում:
Գյուղացիներն ասում են, որ որոշ մարդիկ արդեն սկսել են քանդել իրենց խաղողի այգիները, որովհետեւ չեն ուզում մշակել այսպիսի պայմաններում: Գյուղացիներից մեկն Aravot.am-ին ասաց. «Այսօր իմ երեխան սոված է, Քաղցրաշենի գինու գործարանը 700.000 դրամ է պարտք, ես հիմա ի՞նչ անեմ»: Գյուղացիներից մեկն էլ ասաց, որ արդեն գյուղերում տնետուն են մտնում ինչ-որ անձինք եւ սպառնում՝ ինչո՞ւ եք բողոքում, ինչո՞ւ եք ցույց անում:
Բողոքի ցույցի մասնակիցներից մեկն էլ ասաց, որ գործարանի տնօրինությունը գյուղացիներին ասել է՝ «կառավարությունը ստիպել է մթերել խաղողը, ես էլ մթերել եմ, դե հիմա թող գան՝ կողքս կանգնեն»:
Կարդացեք նաև
Մանրամասները կներկայացնենք առաջիկայում:
Քիչ առաջ մի խումբ գյուղացիներ մտան կառավարության շենք, հավանաբար վարչապետի հետ հանդիպման:
Նելլի ԲԱԲԱՅԱՆ
