Օրերս 12-օրյա այցով Հնդկաստանում էր գտնվում լրագրողների մի խումբ, որը փորձում էր բացահայտել երկրի մշակույթը, ապրելակերպը, կապ հաստատել եւ ամրապնդել Հնդկաստանի հետ: Այցը կազմակերպվել էր «Լոտոս» հասարակական կազմակերպության օժանդակությամբ:
Լրագրողները, ի թիվս այլ տեսարժան վայրերի, հանդիպեցին ԶԼՄ-ների հետ կապերի ինստիտուտի զարգացող երկրների ուսանողների բաժնի դեկան Անանդ Փրադհանին եւ ռադիոհեռուստաժուռնալիստիկայի բաժնի ղեկավար Շաշվատի Գոզվամին: Շաշվատի Գոզվամին նշեց, որ հեռուստառադիոժուռնալիստիկան զարգացող ժուռնալիստիկայի կարեւոր մասն է կազմում:
Այս ինստիտուտը հնարավորություն է տալիս զարգացող երկրների գործող ժուռնալիստներին մասնակցել 6-ամսյա որակավորման բարձրացման դասընթացներին, ստանալ կրթաթոշակ, անվճար կեցություն եւ իհարկե՝ որակյալ կրթություն:
Հնդկաստանն ունի բոլոր «գայթակղությունները» զբոսաշրջիկներին գրավելու, ընդունելու եւ հմայելու համար: Բացի հայտնի Թաջ Մահալից, Հնդկաստանում եղանք այնպիսի զարմանահրաշ տաճարներում, ինչպիսիք են՝ Ակշերդամը, Լոտոսի տաճարը, Քութուբ Մինար կոչվող ճարտարապետական համալիրը, վայելեցինք «Երազանքների թագավորություն»-ում բեմադրվող «Զանգուրա» պատմական թեմայով շոու-ներկայացումը եւ այլն:
Անմոռանալի էր շատրվանների 3D-ով բեմադրած լազերային շոուի ցնցող տպավորությունն Ակշերդամում:
Կարդացեք նաև
Ագրա, Ջայպուր, Քաշմիր, Լադակխ քաղաքներն առանձնանում են հնամյա հուշարձաններով: Երկիրը հետաքրքիր է նաեւ իր լեռնային, ծովափնյա, անտառային, անապատային բնությամբ: Հնդկաստանն անհավանական զարմանալի է նաեւ իր սովորույթներով ու խոհանոցի բազմազանությամբ:
Ճամփորդության վերջում լրագրողների խումբը հյուրընկալվեց Գոայի Ալիլա Դիվա հյուրանոցում: Պորտուգալիայի նախկին գաղութն աչքի էր ընկնում իր ինքնատիպ ճարտարապետությամբ, զարմանահրաշ բնությամբ եւ իհարկե՝ ծովափնյա հանգստով:
Հնդկաստանն ունի բոլոր հնարավորությունները՝ հյուրընկալելու հայ զբոսաշրջիկներին՝ պարգեւելով անմոռանալի հանգիստ:
ԱՄԱԼՅԱ ՀԱՐՈՒԹՅՈՒՆՅԱՆ
«Առավոտ» օրաթերթ
20.04.2016
