Երկուշաբթի օրը մեկնարկելիք խորհրդարանի հերթական քառօրյա նիստերում քննարկման կդրվի Ընտրական օրենսգրքի լրամշակված նախագիծը: Այս մասին Aravot.am-ի հետ զրույցում ասաց ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը`հավելելով, որ ուրբաթ օրը, հանձնաժողովի նիստում արդեն կքննարկվի ԸՕ-ի լրամշակված տարբերակը:
Մեր զրուցակիցը կարծում է նաեւ, որ քառօրյա նիստերի ընթացքում պատգամավորները կհասցնեն առաջին ընթերցմամբ ընդունել նախագիծը. «Առաջինից երկրորդ ընթերցում ընկած քննարկումները նույնպես շատ կարեւոր են, որպեսզի հստակեցվեն նախագծի հիմնական սկզբունքները: Նաեւ պետք է հասցնենք արդեն հաջորդ քառօրյայում նախագիծն ամբողջությամբ ընդունենք, որպեսզի Սահմանադրությամբ սահմանված ժամկետները չխախտենք»:
Երեկ ԸՕ-ի նախագծի «4+4+4» ձեւաչափի քննարկումների մասնակից ՀԱԿ եւ ՕԵԿ քաղաքական ուժերը համատեղ հայտարարություն էին տարածել, այդ քննարկումների անարդյունավետության մասին:
Այսօր հայտարարությամբ է հանդես եկել նաեւ ձեւաչափի մյուս`հասարակական հատվածի կողմը, դարձյալ փաստելով այդ քննարկումներից սպասվելիք արդյունքի բացակայությունը: Ի՞նչն է պատճառը, որ անգամ քառօրյա պատերազմի արդյունքում հանրապետությունում առաջացած նոր իրավիճակից հետո, իշխանությունը չի ցանկանում իր դիրքերը զիջել`Aravot.am-ի հարցին, Հովհաննես Սահակյանը պատասխանեց. «Զիջելը, բանակցելը ճիշտ տերմիններ չեն, մենք քննարկել ենք: Այնտեղ որեւէ որոշում չպիտի կայացվեր, այդ մասին տեղյակ են եղել բոլոր մասնակիցները եւ առնվազն տարօրինակ է, որ հիմա նման հռետորաբանությամբ են խոսում: Ինձ համար շատ կարեւոր եւ լավ էին այս քննարկումները, քանի որ դրանք հնարավորություն տվեցին ստուգել քո փաստարկների ամրությունը եւ կարողացար նոր մոտեցումներ գտնել, որոնք անպայման տեղ կգտնեն ԸՕ-ում:
Կարդացեք նաև
Քննարկումները չէին սկսվում եւ չէին ավարտվում այդ հինգ կետերի շուրջ, թեեւ առանցքում հենց դրանք էին, որոնց հետ կապված մենք մեր փաստարկ-հակափաստարկները ներկայացրել ենք: Եթե որեւէ տեսակետ մեզ համար ընդունելի էլ չի եղել, ապա դա հրապարակային ներկայացվել եւ հիմնավորվել է»:
Նելլի ԳՐԻԳՈՐՅԱՆ
