Եվրոպայի խորհրդի խորհրդարանական վեհաժողովի գարնանային նստաշրջանի լիագումար նիստին ԵԽ գլխավոր քարտուղար Թյորբորն Յագլանդը, անդրադառնալով ՀՀ-ում Ընտրական օրենսգրքի շուրջ ծավալված քննարկումներին, ևս մեկ անգամ շեշտեց, որ այս հարցում անհրաժեշտ է ապահովել կոնսենսուս:
Պարոն Յագլանդին Ընտրական օրենսգրքի վերաբերյալ հարց հղեց ԵԽԽՎ հայկական պատվիրակության անդամ, ՀՀ ԱԺ ՀԱԿ խմբակցության ղեկավար Լևոն Զուրաբյանը: Պարոն Զուրաբյանը մասնավորապես խոսեց այս հարցում ընդդիմություն, իշխանություն և քաղաքացիական հասարակություն եռակողմ բանակցություններում ընդհանուր հայտարարի բացակայության մասին: Նա նաև հայտարարեց, թե այն հինգ պահանջները, որոնք ներկայացրել էին ընդդիմությունն ու քաղաքացիական հասարակությունը, իշխանության կողմից չեն ընդունվել:
Այնուհետև Լևոն Զուրաբյանը պարոն Յագլանգդին հարցրեց. «Հնարավոր համարո՞ւմ եք, որ Դուք անձամբ դիմեք ՀՀ իշխանություններին, որպեսզի նրանք կարողանան կոնսենսուս ձևավորել ընտրական օրենսգրքի շուրջ»:
Կարդացեք նաև
ԵԽ գլխավոր քարտուղարը` ի պատասխան հարցի հիշեցրեց, որ կոնսենսուսի ապահովումը կախված է նաև ընդդիմությունից ու ասաց. «Ընտրական օրենսգրքի շուրջ կոնսենսուս ապահովելը միշտ կարևորել եմ: Այո, մենք հորդորել ենք ՀՀ իշխանություններին ապահովել այդ կոնսենսուսը, բայց դա նաև կախված է ընդդիմությունից: Մենք պատրաստ ենք աջակցել երկու կողմերին, որպեսզի ընդդիմություն-իշխանություն արդար մրցակցություն ապահովվի ընդդիմության` իշխանության հասնելու համար»:
Պարոն Յագլանդը եզրափակելով` ևս մեկ անգամ շեշտեց, որ իր համար սկզբունքային է, որ այնպիսի փաստաթղթերը, ինչպիսիք են Սահմանադրությունը, Ընտրական օրենսգիրքը, հիմնված լինեն կոնսենսուսի վրա`քաղաքացիական հասարակության ներգրավվածությամբ:
Տաթև ՀԱՐՈՒԹՅՈՒՆՅԱՆ
