2017 թվականի աշնանը Իտալիայի Վերոնա քաղաքում տեղի կունենա «Ամեն» երաժշտական, դրամատիկական ներկայացման առաջնախաղը:
Այն նվիրվում է Հայոց ցեղասպանության, ինչպես նաև աշխարհում տեղի ունեցած ու այսօր էլ շարունակվող բոլոր ցեղասպանությունների զոհերի հիշատակին:
«Ամեն», որովհետև այս բառի իմաստն ընկալելի է աշխարհի բոլոր լեզուներում»,- «Թուֆենկյան պատմական Երևան» հյուրանոցում այսօր լրագրողների հետ հանդիպման ժամանակ պարզաբանեց ծրագրի երաժշտական պրոդյուսեր, կոմպոզիտոր Արաքսյա Մուշեղյանը:
Սցենարի հեղինակ Էդուարդ Այանյանի խոսքով՝ հայ ժողովրդի ծագման, հավատքի, հոգևոր ու մշակութային արժեքների մասին պատմող ներկայացման նպատակն է ցույց տալ, որ, չնայած մեր ողբերգական կորուստներին ու փորձություններին, մենք կարողանում ենք ապրել, սիրել, ստեղծագործել. «Մենք ներկայանում ենք մեր ամենաարժեքավոր զենքով՝ հազարամյակների հարուստ մշակույթով: Աշխարհը մեզ պետք է այս տեսանկյունից ճանաչի»,- ասաց Էդուարդ Այանյանը:
Կարդացեք նաև
«Ամեն»-ի իտալացի պրոդյուսեր Դավիթ Զարդի կարծիքով, սա հրաշալի հնարավորություն է ներկայացնելու Հայաստանն իր պատմությամբ ու հարուստ մշակույթով:
«Խոսելով ցեղասպանության մասին՝ մենք խոսելու ենք հանդուրժողականության մասին, որի պակասի արդյունքում այսօր աշխարհում տեղի են ունենում նոր ցեղասպանություններ: Ցավոք, աշխարհում շատացել է ատելությունը»,- հավելեց նա:
Վերոնայից հետո «Ամեն»-ը կներկայացվի աշխարհի խոշորագույն քաղաքներում՝ Լոնդոն, Փարիզ, Նյու Յորք և այլն:
Ներկայացման մեկնարկի համար իտալական քաղաքի ընտրությունը Դավիթ Զարդը համարում է լավ առիթ՝ երկու հազար տարվա պատմություն ունեցող Վերոնայից խոսելու ևս շատ հին ազգի պատմության մասին:
Բեմադրող, պարուսույց Ռուդոլֆ Խառատյանի խոսքով՝ գլխավոր խնդիրն այն է, որ օտարը տեսնի, թե հայը որտեղից է գալիս, ինչ առաքելություն ունի և ուր է գնում. «Այս ճանապարհին պետք է ցույց տանք, որ եղել են և՛ ջարդեր, և՛ պատերազմներ, բայց ոչ թե դրանք են մեր ազգի համար վճռորոշը եղել, այլ այն, որ մենք կանք ու լինելու ենք»,- ընդգծեց նա:
Սիրանուշ ՀԱՅՐԱՊԵՏՅԱՆ
