«Հայագիտության և հասարակական գիտությունների բաժանմունքի կողմից նախորդ տարի հրատարակվել է 167 գիրք, որից 20-ը` արտասահմանում, 882 հոդված, որից 167-ը` արտասահմանում: Միտումը դրական է, քանի որ նախկինում ավելի քիչ գրքեր և հոդվածներ էին հրատարակվում արտասահմանում»,- այս մասին այսօր ՀՀ ԳԱԱ-ի տարեկան ընդհանուր ժողովի ընթացքում խոսեց Հայագիտության և հասարակական գիտությունների բաժանմունքի ակադեմիկոս-քարտուղար, ՀՀ ԳԱԱ ակադեմիկոս Յուրի Սուվարյանը:
Պարոն Սուվարյանը ժողովի ընթացքում ներկայացրեց 2015թ-ի գիտական և գիտակազմակերպական գործունեության հիմնական արդյունքները. « Մեր բաժանմունքը հրատարակում է ակադեմիայի ստեղծած գրքերի գրեթե 90 տոկոսը և հոդվածների 54 տոկոսը: Բաժանմունքի կազմում ընդգրկված են ՀՀ ԳԱԱ 9 ակադեմիկոս, 19 թղթակից անդամ: 2015 թ. հրատարակվել են «Պատմաբանասիրական հանդես»-ի, «Բանբեր հայագիտության» հանդեսի և «Լրաբերի» 3-ական համար: Բացի այս հանդեսներից նախորդ տարում ստեղծվել է «Հիմնարար հայագիտություն» էլեկտրոնային հանդեսը, այն միայն անգլերենով է հրատարակվում: Հանդեսը սկսել է թողարկվել ապրիլից և ընդամենը երկու համար է թողարկել, բայց այն այսօր կարդում են 111 երկրներում»:
ՀՀ ԳԱԱ ակադեմիկոսը նշեց, որ հաշվետու տարում կազմակերպվել են 22 միջազգային և 24 հանրապետական գիտաժողովներ: Նա նաև անդրադարձավ Հայոց ցեղասպանության 100-րդ տարելիցին նվիրված միջոցառումներին. «2015թ. մի շարք հրատարակություններ և գիտական միջոցառումներ նվիրվել են Հայոց ցեղասպանության 100-րդ տարելիցին, մասնավորապես հրատարակվել է 56 գիրք, որից 16-ը` արտասահմանում, 223 հոդված, որից 49-ը` արտասահմանում, կազմակերպվել և անցկացվել են 26 միջազգային և 29 հանրապետական գիտական միջոցառումներ, այդ թվում «Հայոց ցեղասպանություն 100. ճանաչումից հատուցում» խորագրով միջազգային գիտաժողովը, որին զեկուցումներով մասնակցել են ինչպես հայաստանյան գիտնականներ, այնպես էլ արտասահմանյան 25 հայագետ»:
Կարդացեք նաև
Պարոն Սուվարյանը խոսեց նաև լուծման ենթական որոշ հիմնախնդիրների մասին. «Մեզանում խիստ քիչ են միջգիտակարգային համատեղ մշակումները. թույլ է կոորդինացիան: Միջազգային գիտական կապերը մեր հաջորդ խնդիրն է, թեև ունենք շատ հրապարակումներ արտասահմանում, բայց թերևս ակտիվ չեն մեր միջազգային կապերը»:
Արփի ԿԻՐԱԿՈՍՅԱՆ
