Հայաստանի կառավարությանն առընթեր «Գյուղական տարածքների տնտեսական զարգացման ծրագրերի իրականացման գրասենյակ» (ԻՖԱԴ) պետական հիմնարկի կողմից, Հայաստանին տրված վարկային միջոցներով, 2012 թ.-ից գազաֆիկացման աշխատանքներ են մեկնարկել Տավուշի մարզի սահմանամերձ Ոսկեպար, Բաղանիս,Կոթի, Ոսկեվան, Բարեկամավան, Ջուջեւան համայնքներում: Այդ նպատակով տրամադրվել է 675 միլիոն դրամ, կառուցվել է 74.6 կմ ընդհանուր երկարությամբ գազախողովակաշար:
Սահմանամերձ վերոհիշյալ գյուղերից խորհրդային տարիներին միայն Ոսկեպարն է գազաֆիկացված եղել: Հայաստանի տարածքում անկլավ հանդիսացող ադրբեջանական Յուխարի Ասքիպարա (թարգմանաբար՝ Վերին Ոսկեպար) գյուղը սնուցող գազատարն անցնում էր Ոսկեպարի տարածքով: Դրա համար Ոսկեպարի բնակիչները անցյալ դարի 80-ական թվականներին Ադրբեջանի տարածքից ձգվող գազատարից անվճար էին օգտվում:
Նոյեմբերյանի տարածաշրջանի սահմանամերձ վերոհիշյալ գյուղերում գազատարն արդեն 2 տարի կառուցված է, սակայն գյուղացիների բնակարաններում գազ չկա: Բնակիչները հնարավորություն չունեն գազատարից իրենց տուն գազի խողովակ անցկացնելու: Դրա համար նրանք խողովակի յուրաքանչյուրի մետրի հաշվով պետք է վճարեն 3800 դրամ, տարբեր ընտանիքների համար կազմում է 70-100 հազար դրամ: Սահմանագոտում ապրող, սոցիալապես անապահով գյուղացիները նման հնարավորություն չունեն:
Ոսկեպարի, Ոսկեվանի համայնքապետարաններից տեղեկացանք, որ այդ համայնքապետարանները գազաֆիկացման աշխատանքների դիմաց պարտք ունեն: Համայնքները պետք է գազաֆիկացման աշխատանքների համար ֆինանսական ներդրում կատարեին:
Կարդացեք նաև
Համայնքները այդ գումարի մի մասի չափով ներդրում են կատարել, մնացած ֆինանսական ներդրումը համայնքապետարանների փոխարեն կատարել է Հայաստանի վերականգնվող էներգետիկայի եւ էներգախնայողության հիմնադրամը:
Ոսկեվանի եւ Ոսկեպարի գյուղապետեր Սերյոժա Ալեքսանյանը եւ Երվանդ Եգանյանը հայտնեցին, որ այդ հիմնադրամի տնօրեն Թամարա Բաբայանն այժմ պահանջում է վերադարձնել պարտքը: Սակայն սահմանամերձ համայնքապետարանները դրա համար ֆինանսական միջոցներ չունեն:
Բաղանիսի գյուղապետ Նարեկ Սահակյանը հայտնեց, որ նշված համայնքների գազաֆիկացման նպատակով գազաբաշխիչ կայան կառուցելու համար գործարար Միքայել Վարդանյանը նվիրաբերել է 76 միլիոն դրամ:
Բաղանիսի գյուղապետի խոսքերով` իրենց համայնքը գազաֆիկացման համար գումարի պարտք ունի ԻՖԱԴ-ին:
Ոսկան ՍԱՐԳՍՅԱՆ
