Ապրիլի 19-ին «Ազատություն Լեւոն Հայրապետյանին» նախաձեռնող խմբի կազմակերպած բողոքի ցույցի ընթացքում իրավաբան Հայկազ Մակարյանը Լեւոն Հայրապետյանի դեմ հարուցված քրեական գործի մասին մի շարք դիտարկումներ ներկայացրեց լրագրողներին:
Ինչպես հայտնի է, Հայրապետյանը մեղավոր է ճանաչվել` Բաշկիրիայի նախկին սենատոր Իգոր Իզմեստևի մորից 700.000 ԱՄՆ դոլար կաշառք վերցնելու համար:
«Նախաքննական մարմինների աշխատանքը պարզապես խայտառակություն է, որովհետեւ հստակ փաստեր չկան, թե ո՞վ է այդ մարդը, ի՞նչ հանգամանքներում է այդ գումարը վերցվել, եւ առհասարակ` որտեղի՞ց է առաջացել այդ 700 հազար դոլարը: Բացի այդ, ՌԴ քրեակատարողական օրենքի համաձայն, եթե գործով ձեռք բերված ապացույցները բավարար չեն տվյալ անձին դատարան կանչելու համար, ապա այդ գործին ընդհանրապես ընթացք չի տրվում: Ինչպես պարոն Հայրապետյանի փաստաբանն է նշում, ի սկզբանե բավարար փաստեր եւ ապացույցներ չեն եղել` Հայրապետյանի դեմ քրեական գործ հարուցելու համար: ՌԴ համապատասխան օրենսգրքով` իրավունք չունեն առանձնակի ծանր հիվանդություններ ունեցող մարդուն նման անմարդկային մոտեցում եւ վերաբերմունք ցուցաբերել:
Բանտախցում Հայրապետյանը հոգնած-ընկած էր աթոռին, իսկ իրավապահները նրա ձեռքն են շղթայում, մի խոսքով` հոգեբանական գրոհ են գործում նրա վրա: Սա արդեն միջազգային հանցագործություն է»,-այսպես մեկնաբանեց Հայկազ Մակարյանը:
Կարդացեք նաև
Իրավաբանն ասաց, որ իր համար եւս մեկ հանգամանք, կարելի է ասել, զավեշտալի է. «Այդ ո՞ր դատավորն է գործը հասցրել այնպիսի սրության, որ Հայրապետյանին անպայման պետք է պահել պատժախցում, այլ ոչ` ազատության մեջ: Ի սկզբանե Հայրապետյանին խարդախության, փողերի լվացման հոդվածներ էին վերագրվում, բայց հարց է առաջանում` եթե ռուսական արդարադատությունն այդքան իրավահավասար է, ի՞նչ եղան այդ հոդվածները, ո՞նց դուրս եկան գործից… Այսինքն, տեսան, որ գործն այդ մարդու վրա «կարել» չի ստացվում, մեկ այլ` X գործի անցան: Հետեւաբար, չի կարող այդքան իրավական բացերի արանքում լինել այնպիսի հանգամանք, որը կարող էր Հայրապետյանին բերել այն վիճակին, որում նա հիմա գտնվում է»:
Մակարյանը նկատեց, որ այս գործում հիշատակվում է նաեւ ռուսաստանցի միլիարդատեր Ալիշա Ռուսմանովի անունը. «Նա մեծ կապեր ունի ադրբեջանական բռնապետական ղեկավարության հետ: Ըստ ռուսական մամուլի, նա բավականին ազդեցիկ է: Լեւոն Հայրապետյանն անմիջական օգնություն է ցուցաբերում ԼՂՀ-ի զարգացման գործին, դա փաստ է: Կարծում եմ` Ռուսաստանի ադրբեջանամետ ուժերն են ՌԴ-ի ինչ-ինչ պետական ուժերի միջոցով փորձում ներգործել եւ կասեցնել Հայրապետյանին»:
Իրավաբանը միաժամանակ ընդգծեց, որ խոսքն անմիջապես Ռուսաստանի ներգրավվածության մասին չէ, քանի որ Հայրապետյանը նաեւ ռուս հասարակության շրջանում է հարգանք վայելում. «Այստեղ որոշ անհատների եւ Ալիեւյան նավթադոլարների խնդիրն է: Ի դեպ, Հայրապետյանն այս տարի Ղարաբաղում մտադիր էր կազմակերպել 1000 եւ ավելի զույգերի հարսանիք: Սա ՌԴ-ի ադրբեջանամետ ուժերը չէին կարող անտեսել»,-եզրափակեց Մակարյանը:
Այլ մանրամասները` տեսանյութում:
Լուիզա ՍՈՒՔԻԱՍՅԱՆ
