Այսօր Թեքեյան մշակութային միությունում մեկնարկեց Ռամկավար ազատական կուսակցության (ՌԱԿ) Սփյուռքի կառույցների ներկայացուցիչների եռօրյա խորհրդակցական հավաքը: Նիստին մասնակցում էին ՌԱԿ Միացյալ նահանգների, Կանադայի, Լիբանանի, Հունաստանի, Եգիպտոսի, Ֆրանսիայի, Մեծ Բրիտանիայի, Սիրիայի, Իրաքի և այլ շրջանակների, ինչպես նաեւ ՌԱԿ Հայաստանի կառույցների ներկայացուցիչները:
Խորհրդաժողովի ընթացքում ՌԱԿ-ականները կքննարկեն հիմնականում ներկուսակցական-կազմակերպական հարցեր: Օրակարգում ընդգրկված են քառօրյա պատերազմի հետևանքների վերացման, արտասահմանում քարոզչական-լոբբիստական աշխատանքներին վերաբերող հարցեր եւս:
«Անցնող տասը տարիներուն, ավանդական մեր կազմակերպությունը, որ Արմենական կազմակերպության հարազատ ծնունդն է տագնապ մը բոլորեց: Եվ այդ տագնապը, որքան վնաս էր Սփյուռքի կազմակերպություններուն, նույնքան հայրենիքին»,- լրագրողների հետ զրույցում ասաց ՀՌԱԿ մամուլի հանձնախմբի տնօրեն Հակոբ Վարդիվառյանը`մանրամասն անդրադառնալով Հայաստանի երեք հանրապետությունների կյանքում ՌԱԿ-ի ունեցած ներդրումներին եւ դերակատարմանը:
Կարդացեք նաև
Վերջին տասը տարիների երկփեղկումից հետո, ըստ պարոն Վարդիվառյանի, ՌԱԿ-ը փորձում է կրկին միավորվել. «Ասիկա երկրորդ խորհրդակցական հանդիպումն է, մեկ խորհրդակցական հանդիպում ունեցանք նոյեմբերին: Հուսամ, որ ասկե կելնենք վերականգնումի, միության ծրագիրներով, որպեսզի այսուհետ մեր բոլոր քսան շրջանակները, քանի մը ամիսը ետ, դարձյալ մայրաքաղաք Երեւան գան`մեր ընդհանուր պատգամավորական ժողովը գումարելու: Նաեւ ծրագրելու`մեր կուսակցության կենտրոնը Երեւան բերելու»:
Հակոբ Վարդիվառյանը վստահեցնում է, որ այս շարժումը եւ Հայաստանի ռամկավար ազատական կուսակցությունը որեւէ խնդիր չունեն միմյանց հետ: «Շատ սրտաբաց կգործակցինք»,- հավաստիացրեց նա`հավելելով, որ կան «ուրիշ» շրջանակներ, որոնք այլ կերպ են մտածում եւ որոնք անհարիր են իրենց կուսակցական շրջանակներին:
Թե ովքե՞ր են այդ ուրիշները, Հակոբ Վարդիվառյանը չցանկացավ մանրամասնել, միայն ասաց, որ անհամաձայնությունները գաղափարական կամ քաղաքական չեն, բացառապես՝ աշխատանքի ձեւի եւ մոտեցումների: «Շատ վստահ եմ, որ մեր շարքերուն մեջ բանականությունը կգա ետ, որովհետեւ մենք ծայրահեղ հեղափոխական շարժումներ չենք, տրամաբանող կազմակերպություն մըն ենք եւ մենք կրնանք գալ եւ օգտակար ըլլալ հայ Սփյուռքին, հայրենիքին, մանավանդ այս օրերուն»,- ասաց նա`հավելելով, որ Հայաստանի երրորդ հանրապետության հիմնադրումից ի վեր, իրենք «շվարած» վիճակում էին, քանի որ իրենց համար անակնկալ էր. «Հայաստանի երրորդ հանրապետության ծնունդը`մենք չէինք սպասեր, որ գորբաչովյան վարդապետությունը փուլ պիտի գար եւ մենք ձեւով մը անկախ պիտի դառնայինք»:
ՌԱԿ-ի փլուզման գործում, ըստ Հակոբ Վարդիվառյանի, տխուր դեր խաղաց նաեւ Հայաստանի երրորդ հանրապետության հիմնադիր նախագահ Լեւոն Տեր-Պետրոսյանի այն հայտարարությունը, որ սփյուռքում գործող ավանդական կուսակցությունները ժամանակավրեպ կազմակերպություններ են:
Հիշեցնենք միայն, որ ժամանակին ՀՌԱԿ-ը բավական լղոզված քաղաքականություն էր վարում`մշտապես եւ բոլոր հարցերում պաշտպանելով տվյալ շրջանի իշխանությանը, ինչի պատճառով էլ կուսակցությունում խմորումներ սկսվեցին:
Ռամկավարների ներքին անհամաձայնությունների ֆոնին բավական ուշագրավ միջադեպ գրանցվեց համաժողովի հենց սկզբից. տեւական ժամանակ բարձրախոսները չէին կարողանում կարգավորել եւ համաժողովի մեկնարկային ողջույնի ելույթները հնչեցին առանց բարձրախոսների:
Ավելի ուշ ՌԱԿ ԱՄՆ կառույցի ներկայացուցիչ Վարդան Նազիրյանն այդ փաստը «սաբոտաժ» որակեց: Հայտնի է, որ Թեքեյան մշակութային կենտրոնը պատկանում է ՀՌԱԿ մի քանի անդամների: Պնդումներ կային, որ նախապես չեն ցանկացել այս դահլիճը տրամադրել այս միջոցառման համար:
Համաժողովը կընտրի լիազոր մարմին, որը կգործի մինչեւ վերջնական միավորումը:
Նելլի ԳՐԻԳՈՐՅԱՆ
Տակաւին գոյութիւն ունին ?