Ներկայումս Երեւանի կենտրոնական կլինիկական զինվորական հոսպիտալում ապրիլյան քառօրյա մարտական գործողությունների արդյունքում վիրավորում ստացած 125 զինծառայողներ են բուժվում: Այս մասին այսօր լրագրողների հետ զրույցում ասաց պաշտպանության նախարարության Զինված Ուժերի ռազմաբժշկական վարչության պետի տեղակալ Հարություն Գալստյանը:
Նրա խոսքերով՝ 125 վիրավորներից 45-ն են կենտրոնական կլինիկական հոսպիտալում, մյուսները Պաշտպանության բանակի եւ կայազորային հոսպիտալներում են: Գալստյանի փոխանցմամբ՝ 5 զինծառայողի վիճակը ծայրահեղ ծանր է գնահատվում, ընդհանուր առմամբ, բոլորի մոտ նկատվում է դրական տեղաշարժ, այս ընթացքում 3 զինծառայող դուրս է գրվել:
Մանրամասները՝ տեսանյութում
Հարություն Գալստյանն ասաց, որ զինծառայողների մեծ մասը բեկորային վնասվածքներ են ստացել, նրանցից մեկը գլխի շրջանում է վիրավորում ստացել:
Պետի տեղակալն անդրադառնալով վիրավորում ստացած զինծառայողների հետագա բուժմանը՝ դուրս գրվելուց, նշեց, որ պետությունը հոգալու է զինվորների կարիքները:
Ինչ վերաբերում է զինծառայողներին արտերկրում բուժման ուղարկելուն, արդյոք պետությունը կհոգա՞ ֆինանսական ծախսերը, պարոն Գալստյանն ասաց, որ արտերկրում բուժումը կախված է հիվանդությունից:
Մանրամասները` տեսանյութում
Ապրիլի 5-ին հրադադարի բանավոր պայմանավորվածությունից հետո ադրբեջանական կողմից շարունակվող գնդակոծությունից 3 զինծառայող վիրավորում է ստացել, այսօր սպասում են եւս մեկ վիրավոր զինծառայողի, որին տեղափոխում են կենտրոնական հոսպիտալ:
Նելլի ԲԱԲԱՅԱՆ
