Գեղարքունիքի մարզի կազմակերպությունները շարունակում են կամավոր դրամ հանգանակել՝ Արցախին օգնություն տրամադրելու նպատակով: Գեղարքունիքի մարզպետի տեղակալ Անդրանիկ Հակոբյանի տեղեկացմամբ, ապրիլի 14-ի դրությամբ Գեղարքունիքի մարզի հանրակրթական դպրոցների ուսուցիչները եւ աշակերտները Արցախի օգնության ֆոնդին են փոխանցել մոտ 21 միլիոն դրամ:
Նույն ֆոնդին 700 հազար դրամ փոխանցել են Կարմիրգյուղի, 550 հազար դրամ՝ Լանջաղբյուրի, 150 հազար դրամ՝ Գեղարքունիքի գյուղապետարանի, 800 հազար դրամ՝ «Մարտունու ծննդատուն» ՊՓԲԸ, 175 հազար դրամ՝ Սարուխանի բուժամբուլատորիայի աշխատակիցները:
«Այս պահին դրամահավաքը կամավորությամբ շարունակվում է մարզի պետական ու տեղական ինքնակառավարման մարմիններում, մասնավոր ընկերություններում: Բազմաթիվ անհատ քաղաքացիներ էլ Արցախին օգնության ձեռք են մեկնում ինչպես դրամով, այնպես էլ՝սննդամթերքով, առաջին անհրաժեշտության պարագաներով»,-նշեց մարզպետի տեղակալը: Սարուխան գյուղի բնակիչներ Արսեն, Արմեն, Արթուր, Արա, Արամ, Ահարոն Կատվալյանների տրամադրած 10 տոննա կարտոֆիլը եւ Հայկ, Հովհաննես, Հրաչ Հովհաննիսյանների տրամադրած 2,5 տոննա ալյուրն արդեն հասել է Արցախ եւ տրամադրվել Պաշտպանության բանակին:
Գեղարքունիքի մարզպետարան
