Ապրիլի 13-14-ին Հայաստանի ամերիկյան համալսարանում կայացավ « Ցեղասպանություն և գրականություն. իսրայելյան և հայկական համեմատական հեռանկարները» թեմայով գիտաժողով: Երկօրյա գիտաժողովի ընթացքում հայ և իսրայելցի բանախոսները անդրադարձան Հայոց ցեղասպանությանը վերաբերող թեմաներին:
Գիտաժողովի մասնակից իսրայելցի վիպագիր, խմբագիր, Երուսաղեմի իսրայելագիտության ինստիտուտի հիմնադիր և տնօրեն Օրա Ահիմեյրը Հայոց ցեղասպանության վերաբերյալ եբրայերեն լեզվով նախատեսում է հրապարակել վեպ, որը լույս կընծայվի 2016թ. հոկտեմբերին: Վեպը եբրայերեն լեզվով առաջին գիրքն է ցեղասպանության մասին. « Գիրքը Հայոց ցեղասպանության մասին է: Նրանում հատկապես անդրադառնում եմ ցեղասպանության ժամանակ հայ կանանց ճակատագրին, ինչպես նաև հայ- հրեական հարաբերություններին : Ինչ է փոխվել. 100 տարի առաջ և այսօր: Գիրքը ապաստան և հանգիստ փնտրող մարդկանց, ճակատագրերի մասին է: Այստեղ պարզ է դառնում, թե ինչքան մոտ են մեր ազգերի պատմությունները: Մարդիկ, այս գիրքը կարդալով,կհասկանան որ Հայոց ցեղասպանությունը նման է Հոլոքոստին: Սա կարդալով՝ կարծում եմ, որ մարդկանց մեջ կառաջանա այն զգացողությունը, որ ցեղասպանության ճանաչումը բարոյական խնդիր է»:
Գիտաժողովի ընթացքում իսրայելցի գիտնական, պատմաբան Յահիր Աուրոնի ելույթի ժամանակ ՀԱՀ-ի ուսանողները, «Ամոթ Իսրայելին, ճանաչեք Հայոց ցեղասպանությունը», «Ձեր անօդաչու սարքերը սպանում են մեզ» պաստառներով, իրենց բողոքն արտահայտեցին Իսրայելի՝ Ադրբեջանին զենք վաճառելու վերաբերյալ:
Ի պատասխան այդ բողոքի պատմաբանը անդրադարձավ այդ հարցին՝ նշելով, որ արդեն 10 տարի է, ինչ Իսրայելը համագործակցում է Ադրբեջանի հետ, որը իսրայելցի գիտնականի համար ամոթալի է. «Ես փորձել եմ ազդել այդ գործունեության վրա, գրել եմ հոդվածներ այդ մասին, այցելել եմ նույնիսկ Արցախ: Կարծում եմ, մեր հասարակությունը Հայաստանի հետ է և համակարծիք է հայերին: Ըստ երևույթին հրեաները պետք է առաջինը կանգնեին հայերի կողքին, ճանաչեին Հայոց ցեղասպանությունը: Բայց, ցավոք, մինչև հիմա դա տեղի չի ունեցել, նման կերպով մենք դավաճանում ենք Հոլոքոստի զոհերին ու նրանց հիշատակը»:
Կարդացեք նաև
Արփի ԿԻՐԱԿՈՍՅԱՆ
