Շենգավիթ վարչական շրջանի ընդհանուր իրավասության առաջին ատյանի դատարանում ապրիլի 14-ին շարունակվում էր Ավետիք Իսահակյանի անվան կենտրոնական գրադարանի աշխատակից Վեներա Թորոսյանի գործի քննությունը:
Հիշեցնենք, որ ապրիլի 13-ին դատարանը արգելել էր նիստի լուսաբանումը: Այս դատական նիստը բացի Aravot.am-ից լուսաբանում էին այլ լրատվամիջոցներ եւս:
Դատական նիստի սկզբում լրագրողները միջնորդությամբ հանդես եկան, որպեսզի հնարավորություն ընձեռնվի դատական նիստը տեսաձայնագրել: Դատարանը հարցրեց կողմերի դիրքորոշումը: Ամբաստանյալ Վեներա Թորոսյանը հայտարարեց, որ դեմ է, որ դատական նիստը ընդհանրապես լուսաբանվի: Իսկ հանրային պաշտպան Արմինե Ֆանյանը նկատեց, որ անցած դատական նիստը, որը դատարանը արգելել էր լուսաբանել Aravot.am-ը ամբողջությամբ լուսաբանել էր՝ չհետեւելով դատարանի որոշմանը: Նա, հղում կատարելով էթիկական սկզբունքներին, ասաց, որ կարծում է՝ կարելի էր պաշտպանյալի անուն-ազգանունը փոխել:
Դատարանը այս անգամ արգելեց միայն դատական նիստի տեսաձայնագրառումը եւ լուսանկարահանումը: Նա որպես մեղմացուցիչ հանգամանք առանձնացրեց այն, որ Վեներա Թորոսյանը նախկինում դատապարտված կամ արատավորված չի եղել, իրեն լիովին մեղավոր է ճանաչել, տվել է խոստովանական ցուցմունքներ: Մեղադրող Խաչատրյանը միջնորդեց Վեներա Թորոսյանի նկատմամբ կիրառել տուգանք նվազագույն աշխատավարձի վեց հարյուրապատկի չափով:
Կարդացեք նաև
Իսկ Արմինե Ֆանյանը դատարանին ներկայացրեց Վեներա Թորոսյանի հարեւանների գրությունը, որով նա դրական է բնութագրվում, աչքի է ընկնում մի շարք դրական հատկանիշներով: Նա միջնորդեց իր պաշտպանյալի նկատմամբ նշանակել տուգանք նվազագույն շեմի չափով, այսինքն՝ նվազագույն աշխատավարձի հինգհարյուրապատիկի չափով, եւ տուգանքի վճարումը տարաժամկետել մեկ տարի ժամկետով՝ հնարավորություն ընձեռելով Վեներա Թորոսյանին մաս առ մաս վճարել տուգանքը:
Վեներա Թորոսյանը հայտարարեց, որ ընդունել է իր մեղքը, հասկանում է ինչ է կատարել եւ ընդունում է ամբողջ պատասխանատվությունը: Որպես վերջին խոսք նա խնդրեց, հնարավորինս մեղմ պատիժ նշանակել:
Դատարանը հեռացավ խորհրդակցական սենյակ՝ վճիռ կայացնելու: Գործով վճիռը կհրապարակվի ապրիլի 19-ին:
Հիշեցնենք՝ Վեներա Թորոսյանը մեղադրվում է սահմանադրական փոփոխությունների հանրաքվեի օրը այլ անձանց փոխարեն քվեարկելու մեջ: Նրան մեղադրանք է առաջադրվել, որ նա Սահմանադրության փոփոխությունների հանրաքվեի ժամանակ Երեւան քաղաքի Շեւչենկո փողոցի թիվ 34/1 հասցեում գտնվող թիվ 8/31 ընտրական տեղամասում, լինելով հանձնաժողովի նախագահ, այլ անձանց` Նարեկ Ալեքսանյանի եւ Վալենտինա Ալեքսանյանի փոխարեն քվեարկելու դիտավորությամբ` նշված ընտրատեղամասի ընտրողների ցուցակում վերջիններիս անվան դիմաց լրացրել է պատահական` համապատասխանաբար անձնագրային տվյալները եւ ստորագրել վերջիններիս փոխարեն, կնքել է ընտրողների ցուցակում, որից հետո հանձնաժողովի մյուս անդամներից աննկատ կատարել է քվեարկություն:
Ամի ՉԻՉԱԿՅԱՆ
Վեներա Թորոսյանը ոչ միայն Նարեկ Ալեքսանյանի եւ Վալենտինա Ալեքսանյանի փոխարեն է ստորագրել եւ լցոնել, այլեւ սույն տեղամասի 600 ԱՅՈ-ների մեծ մասի հեղինակն էլ ինքն է՝ թաղի խուժանի համահեղինակությամբ։ Սուտ է, թե հանձնաժողովի անդամներից թաքուն է քվեարկել, այդպիսի բան հնարավոր չէ։