ՀՀ քննչական կոմիտեի Կոտայքի մարզային քննչական վարչությունում հարուցվել է քրեական գործ՝ «Արարատնյուզ» կայքի գլխավոր խմբագիր Ալեն Սիմոնյանի լիազորությունների իրականացմանը խոչընդոտելու դեպքի առթիվ՝ ՀՀ քրեական օրենսգրքի 149-րդ հոդվածի 1-ին մասի հատկանիշներով։
ՀՀ քննչական կոմիտեի Կոտայքի մարզային քննչական վարչությունում ստացվել է «Արարատնյուզ» կայքի գլխավոր խմբագիր Ալեն Սիմոնյանի հաղորդումն առ այն, որ ապրիլի 12-ին Հրազդանի քաղաքապետի թեկնածու Արամ Դանիելյանի նախընտրական շտաբում, շտաբի պետի կողմից խոչընդոտվել է իր մասնագիտական գործունեությունը։
Ա.Սիմոնյանը հայտնել է, որ 2016 թվականի ապրիլի 17-ին կայանալիք Հրազդանի քաղաքապետի ընտրությունների գործընթացը լուսաբանելու նպատակով ապրիլի 12-ին գտնվել է Հրազդան քաղաքում և նույն օրը՝ ժամը 18:00-ի սահմաններում, գնացել Հրազդանի քաղաքապետի թեկնածու Արամ Դանիելյանի նախընտրական շտաբ, որտեղ ներկայանալով որպես լրագրող՝ ցանկացել է լուսաբանել ընտրություններին վերաբերող հարցեր, սակայն նրան չեն թույլատրել մնալ շտաբում, հրելով դուրս են հանել՝ դրանով իսկ խոչընդոտելով լիազորությունների իրականացմանը:
Նկատի ունենալով, որ հաղորդման հիման վրա նախապատրաստված նյութերն առերևույթ պարունակում են ՀՀ քրեական օրենսգրքի 149-րդ հոդվածի 1-ին մասի հատկանիշներ՝ Կոտայքի մարզային քննչական վարչությունում ապրիլի 13-ին հարուցվել է քրեական գործ։ Նույն օրը քրեական գործն ուղարկվել է ըստ քննչական ենթակայության՝ ՀՀ հատուկ քննչական ծառայություն։
Կարդացեք նաև
Ծանուցում. Ենթադրյալ հանցանքի մեջ կասկածվող կամ մեղադրվող անձը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով`դատարանի`օրինական ուժի մեջ մտած դատավճռով:
ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժին
