Երևանի քաղաքապետարանում շարունակվում են մայրաքաղաքի Գլխավոր պողոտայի «Վերնիսաժի» հատվածի վերակառուցման, արդիականացման, կանոնակարգման և բարեկարգման նախագծային առաջարկների քննարկումները: Հերթական հանդիպում-քննարկումը զբոսաշրջության ոլորտի ներկայացուցիչների հետ էր: Երևանի քաղաքապետի տեղակալ Դավիթ Օհանյանի և ծրագրի պատասխանատուների հետ հանդիպմանը մասնակցում էին ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը, Հայաստանի ազգային մրցունակության հիմնադրամի տնօրեն Արման Խաչատրյանը, Հայաստանի ներգնա տուրօպերատորների միության, Հայաստանի զբոսավարների ասոցիացիայի ներկայացուցիչները, Տուրիզմի հայկական ինստիտուտի ռեկտոր Ռոբերտ Մինասյանը, համայնքային թանգարանների տնօրեններ և ոլորտի ակտիվ ներկայացուցիչներ:
Քաղաքապետի տեղակալը, կարևորելով մայրաքաղաքում զբոսաշրջության զարգացմանն ուղղված ծրագրերը, ընդգծել է, որ «Վերնիսաժի» բարեկարգման և արդիականացման ծրագրի իրագործումը ևս մեկ քայլ է՝ Երևանն ավելի ներկայանալի դարձնելու համար:
«Վերջին տարիներին Երևանի քաղաքապետարանը, ի դեմս մշակույթի և տուրիզմի վարչության, մայրաքաղաքում զբոսաշրջության զարգացման ուղղությամբ ունի իր հստակ քաղաքականությունը, որի շնորհիվ Երևան այցելող զբոսաշրջիկների համար մեր քաղաքն ավելի հետաքրքիր դարձնելու համար բազմաթիվ նախագծեր են կյանքի կոչվել: Առաջիկա մեր ծրագրերում «Վերնիսաժի» արդիականացումն այս առումով կարևորագույն ծրագրերից մեկն է, որն, անշուշտ, կնպաստի նաև ոլորտի զարգացմանը: Նախագծերի քննարկման փուլում մենք առանձնահատուկ կարևորում ենք նաև ձեր կարծիքներն ու առաջարկները»,-նշել է Դավիթ Օհանյանը:
Ներկաները, ողջունելով «Վերնիսաժի» տարածքի բարեկարգման և արդիականացման, ինչպես նաև այն որպես զբոսաշրջային վայր դարձնելուն միտված Երևանի քաղաքապետարանի ծրագիրը, ընդգծել են, որ այն մեծապես կնպաստի քաղաքային զբոսաշրջության զարգացմանը: Ոլորտի մասնագետները, ծանոթանալով նախագծերին, ներկայացրել են իրենց մոտեցումներն ու առաջարկները: Մասնավորապես, «Վերնիսաժի» տարածքում զբոսաշրջային ավտոբուսների կայանման համար առանձին կայանատեղիներ ունենալու առաջարկի առնչությամբ քաղաքապետի տեղակալը տեղեկացրել է, որ այն անպայման հաշվի կառնվի նախագծերում:
Ընդգծելով, որ վերակառուցումից հետո «Վերնիսաժը» Երևան այցելող զբսաշրջիկներին ներկայացվելու է որպես մայրաքաղաքի և, առհասարակ, հայկական մշակույթն ու ավանդույթները ներկայացնող յուրօրինակ այցեքարտ, ներկաները կարևորել են նաև տարածքում արվեստանոցների ստեղծումը, որոնցում մայրաքաղաքի հյուրերը կկարողանան անձամբ, օրինակ, կավից որևէ առարկա պատրաստել կամ էլ գորգագործությանը ծանոթանալ:
Կարդացեք նաև
Հաշվի առնելով «Վերնիսաժի» բազմաֆունկցիոնալ նշանակությունը՝ առաջարկ է ներկայացվել նաև միջոցառումների կազմակերպման համար առանձին փոքր հրապարակ-հարթակ ունենալու գաղափարը, որտեղ շաբաթ-կիրակի, նաև տոն օրերին կներկայացվեն ազգային մշակութային միջոցառումներ:
Անդրադառնալով «Վերնիսաժում» վաճառվող ապրանքատեսականուն՝ ներկաներն առաջարկել են, որ տարածքում առևտուրն ամբողջությամբ կանոնակարգվի, և նախագծի իրագործումից հետո ներկայացվեն միայն վերնիսաժային ապրանքներ՝ արվեստի գործեր, ձեռագործ աշխատանքներ և այլն:
Ներկաներն առանձնացրել են նաև վաճառողների արտաքինի կանոնակարգման խնդիրը, ինչպես նաև տարածքում զբոսաշրջիկների համար սանհանգույցներ կառուցելու անհրաժեշտությունը:
Երևանի քաղաքապետի տեղակալ Դավիթ Օհանյանը, շնորհակալություն հայտնելով քննարկմանը մասնակցելու հրավերն ընդունելու և ներկայացված առաջարկների համար, նշել է, որ դրանք անպայման կքննարկվեն մասնագետների հետ և կներառվեն նախագծի վերջնական տարբերակում:
Երևանի քաղաքապետարան
