«Փաստորեն, ՀՀ իշխանություններն աջակցեցին Ադրբեջանին, Ղազախստանին եւ Բելառուսին, որոնք պահանջեցին, որպեսզի այստեղ տեղի չունենա ԵՏՄ անդամ-երկրների վարչապետերի նիստը, այլ կայանա Մոսկվայում»,- այսպես է մեկնաբանում ՀՀ վարչապետ Հովիկ Աբրահամյանի այցը Մոսկվա «Ժառանգություն» կուսակցության փոխնախագահ Արմեն Մարտիրոսյանը:
«Մեր իշխանություններն այդ քայլով ընդառաջ գնացին Ադրբեջանի, Ղազախստանի եւ Բելառուսի բարեկամությանը: Ամոթ մեր իշխանություններին եւ վարչապետին, որ նման քայլ իրականացրեցին: Սա անողնաշարության գագաթնակետն է: Երկիրը, որն ունի անողնաշար իշխանություններ, երբեք անվտանգ չի կարող լինել, չի կարող պաշտպանել իր շահերը, առավել եւս` ժողովրդի: Ուստի մեզ պետք է համախմբում ոչ թե Սերժ Սարգսյանի, այլ ազգային գաղափարների շուրջ»,-այսօր «Հայացք» մամուլի ակումբում ասաց նա:
«Ժառանգություն» խմբակցության պատգամավոր Զարուհի Փոստանջյանն էլ այսպես մեկնաբանեց. «Այդպես չպետք է լիներ: Եթե ունեինք ուղերձ, պետք է այն արտահայտեինք բողոքի տեսքով: Մենք ցույց ենք տալիս մեր թուլությունը, որը չի կանխարգելում հաջորդ պատերազմը: Քաղաքական եւ դիվանագիտական ասպարեզում թույլ տվեցինք բազմաթիվ սխալներ, եւ, արդյունքում, պատերազմը չկանխվեց»:
Լուիզա ՍՈՒՔԻԱՍՅԱՆ
