«Որպես ՀՀ քաղաքացիներ` պետք է համապետական սգո օր հռչակենք: Այդ բանից հետո պետք է հստակ ներկայացնենք մեր քաղաքական օրակարգը, որը պետք է լինի բոլորինս»,-կարծում է ԱԺ «Ժառանգություն» խմբակցության պատգամավոր Զարուհի Փոստանջյանը:
«Տեսնում ենք, որ պատերազմի օրերին ՀՀ քաղաքացիները չունենալով պատերազմ գնալու օրակարգ, մասնակցեցին դրան ինքնակազմակերպման շնորհիվ: Եկել է պահը ինքնակազմակերպվելու նաեւ այլ տիրույթներում: Թաքնված պատերազմ է այսօր, իսկ մենք նորից որդեգրել ենք պաշտպանողական դիրքորոշում` հարձակողականի փոխարեն»,-այսօր «Հայացք» մամուլի ակումբում ասաց նա:
Զարուհի Փոստանջյանը գտնում է, որ հակամարտության կարգավորման բանակցային գործընթացում ԼՂՀ-ն պետք է ներգրավված լինի որպես լիիրավ կողմ. «Երկչոտությամբ չի կարելի այդ մասին ասել եւ հայտարարել, թե մենք կճանաչենք ԼՂՀ անկախությունը, եթե լինեն լայնածավալ ռազմական գործողություններ: Այդպես չի կարող լինել: Եթե չենք ճանաչում, ԼՂՀ-ն չի կարող բանակցային կողմ լինել»:
Հայ-ռուսական հարաբերությունների ներկայիս փուլը Փոստանջյանը բնորոշեց որպես ճգնաժամային. «Եթե Ռուսաստանը մեր ռազմավարական դաշնակիցն է, ապա նրա նման վարքագիծն անթույլատրելի է: Ռոգոզինի հայտարարությունը, թե շարունակելու են Ադրբեջանին զենք վաճառել, մեր կողմից բացասական պետք է գնահատվի: ՀՀ-ում ռուսական զորքեր եւ բազա է տեղակայված, որոնք արտոնյալ պայմաններով են գործում: Մենք ենք պահում այդ զորքերին: Պետք է պահանջենք, որ ռազմաբազան ունենա իր գինը` շոշափելի դրամական տեսքով»:
Կարդացեք նաև
Պատգամավորը փաստեց, որ 4-օրյա պատերազմի ընթացքում Ադրբեջանը թույլ տվեց միջազգային նորմերի խախտումներ` ագրեսիա, խաղաղ բնակչության նկատմամբ խոշտանգումներ, սպանություններ. «Կան ներքին տեղահանվածներ` Թալիշից եւ Մատաղիսից: Ադրբեջանի պատճառով է դա եղել: Բնակչությունը տուժել է նաեւ գույքի տեսանկյունից: Ռմբակոծությունից հետո ապրելու հնարավորություն չկա: Մեր զինվորների մարմինները վերադարձրել են խոշտանգված վիճակում, ինչը եւս խոսում է ծանր հանցագործության մասին: Այս փաստերը պետք է ագրեսիվ կերպով բանեցնել միջազգային հարթակներում»:
Լուիզա ՍՈՒՔԻԱՍՅԱՆ
